1491/2022-2023
Vawiin khan Lunglei DC leh District Election Officer (DEO) ni bawk Pu Kulothungan A chuan Lunglei DC Conference Hall-ah Tipperaghat Village Council Final Electoral Roll 2022 a tlangzarh.

Tipperaghat VC Member Pu Sasanga Chakma a boral avangin Mizoram State Election Commission (SEC) ruahmanna angin a hmun ruak hnawhkhat turin Bye Election neih tura tih niin inthlan ni tur hi SEC in ala puang dawn a ni.

VC02096-Tipperaghat Final Electoral ah hian vote nei mi 1109 awmin mipa- 605 leh hmeichhia 504 an ni. Bye Election atana Revision of Electoral Roll neihah hian mi 54 (mipa -34, hmeichhia 20) thunluh thar niin, mi 12 (mipa -7, hmeichhia - 5) te hming paih a ni a. Draft electoral roll a elector awm zat 1067 (mipa – 578, hmeichhia - 489) atanga punna zat chu 3.93% a ni.

Election Officer Pi C. Lalduhzuali chuan VC Electoral roll ah hian scheduled tribe voter-te chauh an chuan theih thu sawiin MLA inthlan atan chuan roll revision hi a hranpa a kalpui leh tur anih thu a sawi a ni.

Roll tlangzarhna hunah hian Lunglei Addl DC Pu V. Lalruatliana, Election Officer Pi C. Lalduhzuali te bakah YMA, MJA, Election kaihhnawih official leh Political Party aiawh te an tel a. Electoral Roll hi party hrang hrangte hnenah DEO chuan a hlan nghal a ni.