2748/2024-2025

2024 Khuangchawi thla ni 29: Vawiin khan Lunglei DC Conference Hall-ah Additional Deputy Commissioner Pu James Miahlung kaihhruaiin Lunglei District Anti-Tobacco Squad ṭhut khawm buatsaih a ni a. Zuk leh hmuama ṭhalaite an fihlim theih nana beihpui thlak, "Tobacco Free Youth Campaign 2.0" (TFYC 2.0) kalpui meka Lunglei District chhunga hma lak dan thlir hovin, hma lak zui zel dan tur an sawi ho.

He hunah hian National Tobacco Control Programme (NTCP) Lunglei District Nodal Officer Dr Zoramthangi chuan TFYC 2.0 kalpui meka hma lakna tlangpui a tar lang a. Campaign hlawhtling leh hlawk tak kalpui a nih theih nana hmachhawp leh hma lakna tur hrang hrangte rawt leh ruahman a ni.

He hunah hian Lunglei District tana TFYC 2.0 hawnna hun chu October ni 17, 2024 khan buatsaih a nih thu leh kawng zawh huaihawt nghal a nih thu te, kumin November thla tawp thlengin campaign hi kalpui tur a nih thu te tar lan a ni a. District chhunga zirna inte'n zuk leh hmuama fihlim tura intiamna hun hmang tur leh zirna in tinah zuk leh hmuam laka fihlimna kawnga hma latu monitor inruat tura hriattirna chu District Education Office aṭanga tihchhuah a nih tawh thu te, Bawrhsap pisa aṭangin thingpui dawrah mei zuk phal loh a nih thu thuziak tar tura hriattirna leh District Transport Office aṭangin khualzin phur lirtheiah mei zuk phal a nih loh thu hriattirna chhuah a nih thu te tar lan a ni a. Khawlaiah zuk leh hmuam ṭhat lohzia tar lanna thuziak (pamphlet) sem tum a nih thu leh kohhran ṭhalai zingah leh zirna inah te zuk leh hmuama fihlim tura inzirtirna hun buatsaih tum a nih thu te tar lan a ni bawk.

Hemi puala Lunglei District chhunga zirna inte zuk leh hmuama fihlim, tobacco free educational institution (ToFEI)-a puan an nih theih nana hma lakna kalpui mekah primary school leh middle school 427 chu ToFEI-ah puan fel tawh an ni a. High school leh higher secondary school 124 zinga 65 chu ToFEI-ah puan an ni tawh bawk a, zirna in 59 hmabak a la awm a ni.

He hunah hian vaihlo khuahkhirhna dan [Cigarettes and Other Tobacco Products Act (COTPA) 2003]-in mipui tana him tura inkaihhruaina leh zawm tur dan a duante zawm kim khua, "Tobacco Free Village" puang tura Lunglei District-a hma lak dan tur leh vantlang hmun leh puipunna hmuna mei zu an awm leh awm loh endik tura anti-tobacco squad drive huaihawt chungchang te sawi ho a ni bawk.