655/2025-2026

Lunglei, 2025 Ṭomir thla ni 16: Vawiin khan Mizoram Tourism Department chuan Convention Hall, Convention Centre, Lungleiah khualzinte lo dawngsawnga lo mikhualtu, tourism service provider-te tan hriat tur pawimawh hrang hrang zir hona, 'Capacity Building Programme for Tourism Service Providers' an buatsaih.

He hun hi Lunglei District Bawrhsap Pi Navneet Mann chuan hmanpuiin, fuihna thu a sawi a. Tourism Director Pi R. Lalrodingi chuan hun kaihruaiin, hun buatsaih chhan leh thil pawimawh hrang hrang a sawi a. Lunglei Municipal Council (LMC) Chairman Pu Lalzuithanga bakah, LMC Councillor leh Lunglei Sub-Headquarters YMA (Young Mizo Association) ai awh te aṭangin thu sawi ngaihthlak a ni bawk.

He hunah hian Lunglei khaw chhunga tourism service provider - hotel, homestay, restaurant, etc. neitute koh khawm niin, tourism hmasawnna atana hriat tur pawimawh te, tih tur leh tih loh tur te, khualzin chanchin fel taka chhinchhiah pawimawh dan te, thianghlimna leh khualzin dawnsawnna kawnga ṭangkai tur hrang hrangte chu Tourist Officer Pi C. Ramsangzuali leh Pi H. Lalrintluangi te'n an zirtir a. Zawhna leh chhanna leh sawi hona hun hman a ni bawk.