4985/2025-2026

Lunglei, 2026 Vau thla ni 24: Lunglei District chhunga tung chingtute pualin vawiin khan Lungleia Agricuture Conference Hall-ah tung chin dan zir hona, "Orientation Training for Tung Growers Under NMEO-OS (TBO)" buatsaih a ni.

Training hi Lunglei District Agriculture Officer Dr Samuel Lalliansanga chuan hawngin, tung chin chu a ti tak takte tan ei zawnna tling a nih thu leh State Level-ah pawh policy kalpui mek a nih thu a sawi a. Khawvelah tung ching ram an tlem thu leh China chu a ching tam ber an nih thu sawiin, India ram pawhin tung hriak a mamawh tam ber chu China aṭangin a la lut tih a sawi a. India ram mamawh ringawt pawh a san em avangin tung chin chu hlawkna tham a nih bakah, department pawhin ngaih pawimawh zinga an dah a nih thu a sawi a. Tung chingtute chuan uluk takin ngaihtuahna seng se a duh thu leh ṭanpuina hmuh duh vang ni lovin, mahni intodelh nan leh ramin a mamawhna hre renga ṭhahnem ngaihna tak tak nen hma lak tum se a duh thu sawiin, tung chinna karah thlai hrang hrang sawrkarin a ṭanpui theih ang chi te pawh a chin theih tih hre tur leh Lunglei District anga hming lang tham tura ṭan la turin tung chingtu kal khawmte chu a chah.

He training-ah hian Lunglei District khaw hrang hrang 32 aṭangin tung chingtute an kal khawm a. Agriculture & Farmers Welfare Department, Lungleia mi thiamte'n tung chin dan leh a enkawl dan bakah, a hnu lama hralh chhuah leh sawngbawl dan te zirtirin, zawhna leh chhanna hun hman a ni bawk.