4984/2025-2026

Lunglei, 2026 Vau thla ni 24: Vawiin khan Lungleia Education Complex Conference Hall-ah World TB Day 2026 puala hun hman niin, TB Free Village lawmman sem a nih bakah, Tuberculosis (TB) um bo tura ni 100 chhung beihpui thlak tur, '100 Days TB Campaign' hawn nghal a ni bawk.

He hunah hian Lunglei Municipal Council (LMC) Chairman Pu Lalzuithanga chu Khuallian niin, TB chu khawvela natna inkai chhawn theih zinga thihna thlen tam ber pakhat a nih avangin tihtak zeta do a ṭul thu a sawi a. Mizoramah kum tin mi sang 2 chuangin TB natna kan kai tih hriat leh a vei tam zawkte chu ṭhalai lam an ni ṭhin chu a runthlak hle tiin, a dona kawngah ṭan lak nasat a ngai hle tih lantirtu a nih thu a sawi a. TB chu ṭha taka enkawl chuan natna tihdam theih a nih thu sawiin, India sawrkar pawhin a venna leh tihdamna kawngah theih tawp a chhuah thu leh TB natna veite chu a thlawn veka enkawl an nih bakah, ṭanpuina kawng hrang hrang siamsakin, chaw ṭha chi hrang hrang a thlawna pek an nih thu a sawi a. TB natna veite chu thinhrik leh en hrang lovin, an rilru, taksa leh thlarau damna tura ṭanpui leh damdawi ei ṭha tura fuih ṭhin a pawimawh thu sawiin, TB natna dona kawngah mi tin ṭan rual a ṭul thu a sawi a. 100 Days TB Campaign hnuaia TB case awm thei zawng zawng dap chhuah, TB natna lak inven leh TB natna vei mekte tihdam kawnga hma lakna chu hlawhtling taka kalpui a nih a beisei thu sawiin, 100 Days TB Campaign chu a hawng nghal.

Lunglei District Senior Chief Medical Officer (SCMO) Dr Lalrinthangi'n hun kaihruaiin, hun hman chhan leh kal khawmte lawmna thu a sawi a. Khual zahawm, Election Officer Pi Lalhruaitluangi pawhin thu sawiin, Lungleia Health & Family Welfare Department hma lakna chu fakawm a tih thu leh District Administration nen pawh thawh hona ṭha tak an neih thu a sawi a. Lunglei District chu Mizorama district lian ber a ni chungin TB natna do kawnga a ti ṭha ber kan ni thei hi thawktute inpekna leh kan zavaia thawh hona rah a ni tiin, TB natna do kawngah kan zavaia kan ṭan rual zel a pawimawh a ni, a ti.

He hunah hian Lunglei District TB Officer Dr K. Lalhmachhuana chuan Lunglei District chhunga TB natna veite dinhmun leh a dona kawnga hma lak dan te, TB Free Village dinhmun te PowerPoint Presentation hmangin a tar lang a. Lunglei District-ah TB Free Village-a puan theih khaw 30 an awm tih tar langin, Lunglei District chu TB natna um bo kawnga thawk ṭha ber a nih thu a tar lang bawk.

Vawiina hun hmanah hian Lunglei District leh Hnahthial District chhunga TB natna um bo kawnga ti ṭha (TB Free Village) khaw 30 te hnenah an thawh ṭhat dan ang zelin lawmman Mahatma Gandhi lim (statue) leh thuziak hlan niin, a zawna kum 3 TB Free khaw 8 hnenah Gold Statue, kum 2 TB Free khaw 4 hnenah Silver Statue leh kum 1 TB Free khaw 18 hnenah Bronze Statue hlan a ni.

Lunglei & Hnahthial District TB Free Village 2025:

Gold: Mualṭhuam North, Sekhum, Ralvawng, Sairep, Ṭhuampui, Kawlhawk, Sertlangpui leh Serte.

Silver: Lunglei Farmveng, South Khawlek, Hnakuksura leh Kawrpuichhuah.

Bronze: Chengpui, Thlengang, Mamte, Sumasumi, Old Sachan, Rualalung, Lungrang South, Lalnutui, Putlungasih, Tuisenchhuah, Belthei, Diblibagh, Chawilung, Nunsury, Puankhai, Bualpui H, Rawpui leh South Chawngtui.