1088/2026-2027

Lunglei, 2026 Nikir thla ni 19: Vawiin khan Mizoram sawrkara Urban Development & Poverty Alleviation (UD&PA) Minister Pu K. Sapdanga hovin Lungleia MLA-te, Lunglei Municipal Council (LMC) hotute leh UD&PA official-te chu Lunglei Convention Centre-a LMC Board of Councillors (BoC) Meeting Hall-ah an ṭhu khawm.

He hunah hian Lunglei South bialtu MLA Pu Lalramliana Papuia, Lunglei West bialtu MLA Pu T. Lalhlimpuia, LMC Chairman Pu Lalzuithanga leh councillor-te, UD&PA Commissioner & Secretary Pu K. Lalthawmmawia, Director Pu Jacob Lalawmpuia, LMC Chief Executive Officer (CEO) Pu Lalhmansanga leh UD&PA leh LMC official-te an tel a. UD&PA hnuaia Lunglei khawpui chhung hmasawnna tur hna kal mekte thlir hovin, hmathlir leh hmachhawp hrang hrang an sawi ho.

Minister Pu K. Sapdanga chuan UD&PA hnuaiah Lunglei khawpui hmasawnna tur hna thawh mek leh hmachhawp ṭhahnem tak a awm tih sawiin, khawpui hmasawn nan Lungleia MLA-te leh LMC hotute nen eng kim inhre pawh leh inlung rual tlang taka thawh ho a pawimawh thu a sawi a. Mipui ai awha thlan MLA-te leh councillor-te, LMC leh UD&PA Department te chu tum inang leh rawngbawlsak thuhmun nei an nih angin hma lakna inhriat pawh leh sawi ho ṭhin a ṭul thu sawiin, ṭhut khawm chu hma lakna kal mek leh hmachhawp te, duhthusam leh hmathlir te inhrilh tawnna leh sawi hona atana buatsaih a nih thu a sawi a. UD&PA hnuaia Lungleia hmasawnna hna thawh hrang hrang chu Municipal kuta awm tur leh sum thawk chhuak tur, sum pawh LMC suma lut tura duan a nih thu sawiin, a hlawhtlin hun nghahhlehawm a tih thu a sawi a. Ruahmanna ṭha tak tak awm mah se, hna thawh nan sum a ngaih avangin hmanhmawh theih loh chin a awm tih sawiin, LMC kal tlangin Lunglei khawpui hmasawnna tur hma lakna chak taka a kal chhoh zel a beisei thu a sawi.

LMC Chairman Pu Lalzuithanga chuan inlawmna thu sawiin, UD&PA Minister-in LMC mamawh hrang hrangah ṭhahnem a ngaihpui ṭhin leh a hmuna tlawh a, inkawm hona hun ṭha tak a buatsaih ṭhin chu lawmawm an tih thu a sawi.

Lunglei South bialtu MLA Pu Lalramliana Papuia chuan UD&PA hnuaia Lunglei hmasawnna tur project ṭhahnem tak kalpui mek leh hmachhawp awm chu lawmawm a tih thu sawiin, Mizoram sawrkar, Minister leh department hotute chungah lawm thu a sawi a. Hmasawnna rualkhai tak a awm theih nan ruahmanna siam kawngah inrawn tlan leh inbiak pawhna ṭha neih a pawimawh thu a sawi.

Lunglei West bialtu MLA Pu T. Lalhlimpuia chuan Lunglei tan theih tawpa kawng ṭha buaipui leh siam chhoh zel a nih thu sawiin, kawng ṭha leh tlo nei tur leh khawpui hmasawn nan tuiluankawr ṭha leh felfai zawk neih a pawimawh thu a sawi a. Khawpui ṭhang chho leh insingsa mekah kawng sira thil zuarte felfai zawka enkawl dan tur leh vantlang inthiarna ṭha neih a pawimawh thu te sawiin, vawiina ruahmannain nakin hun thui tak a hril avangin ngaihtuahna sen thiam a ṭul thu a sawi a. Ṭha leh chak zawka hna thawk turin hmasawnna hna thawktute inkara inbiak pawhna ṭha a pawimawh thu a sawi bawk.

UD&PA Commissioner & Secretary Pu K. Lalthawmmawia chuan UD&PA leh LMC thawh hona chungchang leh Lunglei khawpui hmasawnna tura rawtna leh thil pawimawh hrang hrang a sawi a. UD&PA Director Pu Jacob Lalawmpuia chuan UD&PA hnuaia Lunglei khawpui hmasawnna hna kal mek leh hmachhawp hrang hrang a tar lang a. LMC Vice Chairman Pu K. Lalrinawma, Councillor-te leh CEO Pu Lalhmansanga te pawhin Lunglei hmasawnna tura an ngaih pawimawh leh rawtna te, sawrkar hma lakna hrang hrang avanga an lawm thu te an sawi bawk.

UD&PA hnuaia Lungleia hmasawnna hna lian zual kalpui mek leh hmachhawp awm vawiin ṭhut khawma tar lan zingah, State Priority Project (SPP) 2024–2025 hnuaiah cheng nuai 1,750 hu project panga – Sazaikawna LMC Complex, Theiriata Transport Hub, Ramthar AOC-a Market Shed leh C. Ṭhuamluaia Mual bula Multi-Level Car Parking sakna tur leh Saikuti Hall chei ṭhatna tur te a tel a. Urban Infrastructure Development Fund (UIDF 2025–2026) hnuaiah Lunglei Park chei ṭhatna tur leh vantlang inthiarna (pay and use toilet) leh kea kalna (footpath) siamna tur cheng nuai 525 dah niin, SASCI Part-XB hnuaiah khawpui chhung hmasawnna hna hrang hrang 80 thawhna tur cheng nuai 200 dah a ni bawk a. Lunglei Pulse hnuaiah Lunglei khawpui cheina leh hmasawnna ruhrel dinna tur hna hrang hrang 18 atan cheng nuai 1,262 ruahman niin, SASCI 2024–2025 Part-XIII hnuaiah tuichhe paihna leh tuiluankawr Storm Drain & Drainage Network siamna tur cheng nuai 250 leh SASCI 2025–2026 Part-V hnuaiah cheng nuai 1,400 senga Theiriata Common Bio-Medical Waste Treatment Facility dinna tur ruahmanna te a awm bawk.