2367/2024-2025

2024 Khuangchawi thla ni 3: Vawiin khan Lunglei District Level Coordination Committee (DLCC) on African Swine Fever (ASF) & Trans-boundary Animal Diseases (TADS) chu an Chairman, Lunglei District Bawrhsap Pu R. Lalṭhazuala hovin Lunglei DC Conference Hall-ah an ṭhu khawm a. Lunglei District chhunga vawk pul hri (ASF) leng mek chungchanga hma lak zui zel dan tur an sawi ho.

Bawrhsap Pu R. Lalṭhazuala chuan Lunglei District chhungah vawk pul hri vangin vawk tam tak thi leh suat awm tawhin, khua/veng tam tak chu hri lenna hmun (infected area)-ah puan a ni tih sawiin, hri lenna hmunah vawk lak luh leh lak chhuah leh talh a rem tawh loh avangin mipuite tuarna nasa tak a thleng tih a sawi a. Vawk vulhtu, vawk talhtu, sa zuar leh mipui tuarna titlem zawnga hma lak dan leh ruahmanna thar siam dan ngaihtuah ho turin ṭhut khawm chu koh a nih thu sawiin, kal khawmte chu ngunthluk taka ngaihtuahna seng turin a chah a ni.

He hunah hian Animal Husbandry & Veterinary (AH&Vety) Department-a Joint Director (Southern Zone) Dr Lalmakthanga leh District AH&Vety Officer Dr Ngurzidingi Sailo te'n ASF hri leng chungchanga hma lak dan tur ruahmanna awm sa sawi fiahin, ASF chungchanga Lunglei District dinhmun an tar lang a. Hri leng a darh zel lohna tur leh vawk neitu leh mipuite harsatna sut kian a nih theihna tura ngaih dan leh rawtna hrang hrangte sawi ho zui a ni.

He hunah hian vawk hri leng chungchanga zawm tur inkaihhruaina (standard operating procedure - SOP) fel tak ruahman sa chu state sawrkarin mipui zawh tawk tur ngaihtuah chung leh him tur sia a duan a nih thu tar lan niin, hri dona kawngah district administration, AH&Vety, police, khawtlang hruaitu, tlawmngai pawl, vawk vulhtu, vawk talhtu leh mipuite ṭang rualin theih tawp chhuah a ni tih tar lan a ni a. Vawk vulh chu ram chhung ei leh bar leh mipui khawsak dinhmun nghawng a nih angin leh hri leng lai mek a la nih avanga himna tur ngaihtuah chung siin, mipui hmakhaw ngaia vawk talh leh hralh chungchanga inkaihhruaina tur leh fimkhur zawka vil zui dan tur ruahman a ni.

Vawiin ṭhut khawma tar lan a nih danin, kum 2024 chhungin Lunglei District chhungah ASF hri vanga vawk thi 960 leh vawk suat 2,541 awm tawhin, hei hian chhungkaw 855 a nghawng a. Lunglei District-a khaw 31 chu hri lenna hmun (infected area)-a puan mek niin, thlithlai lai hmun (surveillance area) 8 a awm bawk.