3926/2024-2025

Lunglei, 2025 Pawlkut thla ni 23: February ni 12, 2025-a Lunglei District-a village council (VC) leh local council (LC) inthlanpui buatsaih turah inthlan felfai tak a awm theih nana bial (sector) ṭhen hrang hrang vil tura ruat, sector officer-te tan vawiin khan Lunglei DC Conference Hall-ah training buatsaih a ni.

Master trainer, Lunglei DCSO Pu Lalremruata Sailo chuan training hi pein, sector officer tura ruatte chu an hriat tur pawimawh hrang hrang a zirtir a. Zawhna leh chhanna leh sawi hona hun hman a ni bawk.

Lunglei District-a VC constituency 88 awm chu sector 20-ah siam niin, Lunglei Municipal Council huam chhung LC 24 awmna chu sector 3-ah ṭhen a ni bawk a. He'ng bial ṭhen vil tur hian sector officer pakhat ṭheuh ruat niin, a ṭul huna koh theih tur reserved sector officer 6 ruat tel an ni bawk.