4172/2024-2025

Lunglei, 2025 Ramtuk thla ni 10: Lunglei District-a village council (VC) leh local council (LC) inthlanpui 2025 buatsaih tura inthlan buaipuitu tur polling party-te tirh chhuah leh dawnsawnnaa mawh phur tura ruat, Despatch & Receiving Team te tan vawiin khan Lunglei DRDO Conference Hall-ah thil pawimawh inhrilhfiahna (briefing) buatsaih a ni.

He hunah hian Election Officer Pi R. Lalrinzuali, Sub-Divisional Officer (Sadar) Pi TT Beikhaizi leh Sub-Deputy Commissioner te'n hriat tur pawimawh hrang hrang an sawi a. Inthlan buatsaihna tura bungrua leh hmanraw mamawh hrang hrangte kim tak leh felfai taka pek chhuah a nih theih dan tur leh inthlan zawha lehkha pawimawh leh bungruate felfai taka lo dawnsawn dan tur zir ho a ni.

Lunglei District chhunga VC 86 leh LC 24-a inthlan buatsaih turah Despatch & Receiving Team pasarih ruahman a ni a. February ni 11, 2025 (Thawhlehni) zing dar 6 aṭangin Despatch Centre pali - DC pisa, DRDO pisa, LAD pisa leh Treasury tual aṭangin VC 85 leh LC 24-a polling party-te tirh chhuah hi kalpui ṭan tura ruahman a ni a. February ni 13, 2025 (Ningani)-a inthlan buatsaihna tur Lalnutui VC constituency-a polling party turte erawh chu February ni 12, 2025 zing dar 8-ah tirh chhuah an ni thung ang.