DIRECTORATE OF INFORMATION & PUBLIC RELATIONS, Government of Mizoram, India

4116/2024-2025

Lunglei, 2025 Ramtuk thla ni 6: Lunglei District chhunga village council (VC) leh Lunglei Municipal Council (LMC) huam chhunga local council (LC) inthlanpui buatsaih tura inthlan huaihawttu tur, Returning Officer leh Municipal Returning Officer (RO/MRO)-te, inthlan buaipuitu tur Presiding Officer (PRO), Assistant PRO leh Polling Officer (PO)-te tan vawiin khan training hnuhnung ber buatsaih a ni.

Training hi hmun thum - School Education Complex Conference Hall, Convention Centre leh Saikuti Hall-ahte buatsaih niin, master trainer pasarih - Pi TT Beikhaizi (SDO Sadar), Pu Lalremruata Sailo (DCSO), Pu Beitlotha Nohro (DLAO), Pu Vanlalmuana (Asst Professor, Govt JB College), Pu Lalthanmawia (Asst Prof., LGC), Pu Z. Lalthanliana Langva (Asst Prof., LGC) leh Pu C. Lalrindika (Lecturer, Govt HSS Lunglei) te chuan training hi an pe a. Inthlan buatsaihnaa thil ṭul leh pawimawh hrang hrangte zirtirin, ballot paper leh lehkha pawimawh (form) hrang hrang hman dan te a taka zir ho a nih bakah, zawhna leh chhanna leh sawi hona hun hman a ni bawk.

He'ng training-na hmun hrang hrangahte hian Lunglei District chhunga vote nei, inthlannaa mawhphurhna neite tan postal ballot hmanga vote thlakna hmun (facilitation centre) buatsaih niin, inthlannaa mawhphurhna neite chuan vote an thlak nghal a. Hetih rual hian Lunglei District pawn lama vote nei, inthlanna mawhphurhna neite chuan LAD Conference Hall-ah vote an thlak ve bawk a. LAD Conference Hall-ah hian inthlannaa mawhphurtu Lunglei District chhunga vote nei, vawiina vote thlak hman lote tan February ni 7 leh ni 8-ahte vote thlakna hun hawn chhunzawm a ni ang.

Lunglei District-a VC 88 leh LC 24 awmah VC pahnih (seat 3 ve ve awmna) - VC02058-Sailen leh VC02065-Sumasumi-ahte chuan inthlan chuhtu awm chhunte chuh buaitu an awm loh avangin vote thlak ngai lova tlinga puan an ni a. VC 86 leh LC 24-ah, seat 486 (general seat 356 leh reserved seat 130) atan inthlan hi buatsaih a ni dawn a. VC 85 leh LC 24-ah chuan ruahman sa angin February ni 12, 2025 (Nilaini) zing dar 7 leh tlai dar 4 inkarah vote thlak a ni dawn a. VC02030-Lalnutui-ah erawh chuan vanduaithlak takin VC candidate thi a awm avangin State Election Commission (SEC) chuan ruahmanna thar siamin, February ni 13, 2025 (Ningani) zing dar 7 leh tlai dar 4 inkarah vote thlak a ni thung ang.

Attachment