1921/2024-2025

2024 Mimkut thla ni 5: Vawiin khan Lunglei District Police chuan SP Conference Hall, Lungleiah Lunglei District VDP Co-ordination leh Lunglei District chhunga VDP (Village Defense Party) Unit hruaitute tan kumin July ni 1 aṭanga India rama hman ṭan dan thar pathum (New Criminal Laws) zir hona an buatsaih.

He dan thar zir honaah hian Lunglei District Superintendent of Police (SP) Pu J. Lalmuankima chuan VDP-te leh police-te'n thawh hona ṭha tak an neih ṭhin thu leh VDP-te chu police kutke pawimawh tak an nih thu a sawi a. VDP-te hna thawh ṭhat avanga ruihhlo eng emaw zat man a nih tawh thu te, thil tisualtu eng emaw zat man an nih tawh thu te leh VDP-te thawh rimna avanga veng hrang hrangah rukruk a tlak hniam thu te sawiin, VDP-te chungah lawm thu a sawi a. Thawh hona ṭha lehzual nei zel turin a sawm bawk a ni.

He hun hi Additional SP Pu K. Beihmotaosa chuan kaihruaiin, Lunglei Sub-Divisional Police Officer (SDPO) Pu Zarzokima'n India rama dan pathum hman thar - Bharatiya Nyaya Sanhita, 2023 (BNS); Bharatiya Nagarik Suraksha Sanhita, 2023 (BNSS) leh Bharatiya Sakshya Adhiniyam, 2023 (BSA) chungchanga hriat tur pawimawh hrang hrang a zirtir a. Zawhna leh chhanna leh sawi hona hun hman a ni bawk.

Vawiina dan thar zir honaah hian Lunglei khawpui chhung veng hrang hrang aṭangin VDP member 51 an tel a ni.