2065/2025-2026

Lunglei, 2025 Khuangchawi thla ni 27: Vawiin khan Lunglei Deputy Commissioner (Bawrhsap) office-a thawkte chuan DC Conference Hall-ah Vigilance Awareness Week 2025 pualin dik leh rinawm taka sawrkar hna thawk turin thutiam (integrity pledge) an chham rual.

Lunglei Sub-Divisional Officer (Sadar) Pi TT Beikhaizi chuan hun kaihruaiin, hna thawhna hmunah rinawmna nunpui a, dik tak leh thianghlim taka hna thawk tur te, anmahni dawrtute ṭha taka lo chhawn tur leh theih tawp chhuaha lo ṭanpui ṭhin tur te'n DC Office-a thawkte chu a chah a. Thawktute chuan thutiam an chham rual nghal.

Vawiin vek khan sawrkar thu chhuak angin Lunglei District-a office hrang hrangte pawhin Vigilance Awareness Week 2025 pual hian thu an tiam ve bawk.

Vigilance Awareness Week hi sawrkar laipuia Central Vigilance Commission thu angin kum tin Sardar Vallabhbhai Patel-a piancham (October ni 31) chhung khungin hman ṭhin a ni a. Hlemhletna leh ei rukna tibo tur leh a laka inthiar fihlim tura inzirtir tharna leh intiam tharna atan hman ṭhin niin, kumin hian October ni 27 aṭanga November ni 2 thleng he chawlhkar hi hman a ni ang.