DIRECTORATE OF INFORMATION & PUBLIC RELATIONS, Government of Mizoram, India

4298/2024-2025

Lunglei, 2025 Ramtuk thla ni 17: Tuihna siam ṭhat nana sawrkarin hna a thawh hrang hrangte leh a pawimawhnate mipui hnena puanzarna tura ruahman, Lunglei District-a Watershed Yatra Campaign kalpui tur chu vawiin khan Lunglei West bialtu MLA Pu T. Lalhlimpuia chuan Lunglei DRDO Conference Hall-ah a hawng a. DRDO Office tualah thing a phun nghal bawk.

Khuallian Pu T. Lalhlimpuia chuan tun hma chuan tui kan hnianghnar ṭhin a, tunah chuan lei hial a lo ngai ta hian ngaihtuah a tithui hle tiin, nunna leh hriselna atana pawimawh tui humhalh a ṭulzia a sawi a. Environment chhe zel rualin lui tui a tlem tial tial a, tui thianghlim a tlem tial tial avangin mihring hriselna pawhin a tuar zel a ni tiin, tui humhalh kawnga hma laknaah terrace laih te, check dam siam te chu ruahtui khawl tur leh tuihna tipung tura a ṭangkaizia a sawi a. Watershed development hma lakna chuan ramngaw a tihṭhat bakah, tuihna siamtu ṭha tak a nih thu sawiin, Watershed Yatra Campaign chu District mipuite'n ṭangkai taka an hman a beisei thu leh District-in a hlawkpui ngei a beisei thu a sawi.

Lunglei District Rural Development Office-a Project Director Pi ST Lalvensangi chuan Watershed Yatra Campaign chungchang sawi fiahin Pradhan Mantri Krishi Sinchayee Yojana -Watershed Development Component (PMKSY-WDC) 2.0 chu kum 2021 aṭangin Mizoram district zawng zawngah kalpui a nih thu a sawi a. He project-in a tum ber chu kan ram leilung tichereu zawng ni lova tuihna humhalh te, ram bua leh chereu tawh siam ṭhat te, thlai chinna hmun tihzau belh te, lei chung hang luang ral tur ven te, ruahtui khawl khawm ṭangkai zawka hman te leh lo neitute thlai thar tihpun te a nih thu a sawi a. Lunglei District-ah PMKSY-WDC 2.0 hnuaiah project pahnih kalpui a nih thu leh khaw paruk - Sertlangpui, Serte, Lungdai South, Haulawng, Mualṭhuam North leh Mausen te tuam a nih thu te a sawi.

Lunglei DRDO Project Director Pi ST Lalvensangi chuan Watershed Yatra Campaign hi Department of Land Resources, Ministry of Rural Development te'n tuihna siam ṭhat nana sawrkarin hna a thawh hrang hrangte leh a pawimawhnate mipui hnena puanzar nana an buatsaih a nih thu sawiin, India ram pum state 28 bakah, UT 2-ah te hman tum a nih thu a sawi a. He campaign hi thla li (4) chhung hman tura ruahman a nih thu leh National Level-ah chuan February ni 5, 2025 khan hawn a nih tawh thu sawiin, Mizoramah chuan Rural Development Department hnuaiah vawiin, February ni 17, 2025 hian district tinah hawnna hun hman tum a nih thu a sawi.

Attachment