4297/2024-2025

Saitual, the 17th February, 2025: Vawiin chawhma dar 10:00 AM khan DC Conference Room, Saitualah, Pu V. Laldinsanga, Project Director, DRDO kaihhruainain tuihna humhalh kawnga hmalakna ‘Watershed Yatra’ hawnna hun hman a ni a, District Bawrhsap Dr. Lalngura Tlau chu khuallian niin he Watershed Yatra hi a hawng nghal a ni.

He hunah hian khuallian Dr. Lalngura Tlau chuan kalkhawmte hnenah lawmthu a sawi a, Pradhan Mantri Krishi Sinchayee Yojana (PMKSY) WDC 2.0 hnuaia Saitual District-a hmasawnna hrang hrang hmuh tur awm chu lawmawm a tih thu a sawi a. Khuallian chuan he scheme-in a tum ber chu tuihna siam leh humhalh te, lei chunglanga lei tha kal ral tur ven te, inrenchem taka thlai tui pek te leh mipuite tana eizawnna hrang hrang siam te a ni, a ti. Dr. Lalngura Tlau chuan he scheme hnuaia project hrang hrang hmangin chhungkaw tam takin eizawnna ngelnghet an neih phah thin tih sawiin, hemi kawngah theih tawp chhuah zel turin leh he scheme kalpuinaah hian faina lama tan la lehzual turin line department te chu a sawm nghal a. Watershed Yatra T-shirt leh calendar chu khuallian hian a tlangzarh nghal bawk a ni.

Pu Lalhmingmawia, SMS, DRDO chuan PMKSY WDC 2.0 chu Saitual District-a Pawlrang leh Hliappui khuaa kalpui a nih dan te powerpoint presentation hmangin a sawifiah a. Kalkhawmte chuan Pi Helen Zomuanthangi, ARDO, DRDO kaihhruainain ram leh tuihna humhalh tura thutiam (pledge) an chham rual bawk a ni.

Watershed chu tuihna awmna hmun/ tuichhuahna hmun tihna niin, Yatra tih chu ‘zinkawng’ tihna a ni. Watershed Yatra chu tuihna chungchang mipuiten an hriat fiah lehzual nana awmze nei tak a hun bik an hman hi a ni. Watershed chungchanga awareness campaign zau zawka neih a nih theih nan Ministry of Rural Development, Department of Land Resources chuan India ram pumah 15th January atanga 31 March, 2025 thleng hian watershed yatra neih ni se tiin a ruahmanin, he hunah hian activity chi hrang hrang neih tur a ni a. Chungte chu:

1. Thingphun hnatlang (Horticulture Sapling)
2. Cultural Fest (Watershed Mahotsav)
3. Khawlai tihfai hnatlang (Shramdan)
4. School leh vantlang inkhawma Watershed chungchang Awareness campaign neih (Paani ki Paathshala)
5. Watershed chungchanga hnathawk tha chawimawi (watershed Margdarshaks)
6. Watershed Van (motor) nena au rinna hmanga kawna awareness campaign neih

Watershed Yatra launching programme hi National Level-ah February ni 5, 2025 khan Union Minister of Agriculture & Farmers Welfare Shri Shivraj Singh Chauhan in a hawng a. Hemi ni vek hian State Level Nodal Agency-Directorate of Rural Development-ah Rural Development Minister Prof. Lalnilawma pawhin he programme hawnna hi a hmanpui a ni. District tina neih tur a nih angin Saitual District-ah pawh a hawnna inkhawm hi neih a ni a, Block level leh Village level-ah te a theih ang angin hemi hun chhung hian activity hrang hrang te kalpui a ni ang.

Vawiina Watershed Yatra hawnna hun hi Pu V. Laldinsanga, Project Director, DRDO chuan a kaihruai a, District Bawrhsap Dr. Lalngura Tlau chu khuallian niin ahawng nghal a ni. He hunah hian DRDO staff te leh line department hotute an tel a ni.