4869/2025-2026

Lunglei, 2026 Vau thla 17 : Vawiin khan Lunglei DC Conference Hall-ah "Safe Product, Confident Consumers" tih thupuia hmangin World Consumer Rights Day 2026 pualin hun hman a ni a. Lunglei District Bawrhsap Pi Navneet Mann chu Khuallian a ni.

Khuallian Pi Navneet Mann chuan dawrkaite thil zawrh reng reng chu consumer-te tana rin tlak a ni tur a nih thu sawiin, thil chhia leh thi tawh (expire) lei loh tur a ni a, a zuartute pawhin an zuar tur a ni lo, a ti a. Thil siamtute leh zuartute chuan rin tlak ngei an zuar tur a ni tiin, hemi kawngah hian mi tin inzirtir a ṭul thu a sawi a. Tun laiin eirawng bawlna gas LPG a harsa dawn tih thuthang a tam hle tih sawiin, hei hi thu dik lo a ni tih Lunglei mipuite'n an hriat a ṭul thu leh Media te chu thu dik theh darh tura a beisei thu a sawi a. Mipuite chu chi-ai lo tura chahin, hei hi remchanga la a, a man to (black)-a gas zuar lo turin mi tinte a ngen.

Lunglei District Consumer Association Pu JL Hmingthanga'n hun a kaihruai a. Keynote Address sawitu, LDCA President Prof. Lalchhanhima Fanchun chuan dawrkai leh sumdawng (service provider)-te chu dan hnuaiah dik taka an sumdawn a ṭul thu sawiin, consumer-te'n thuneitute hnenah an vuivaina thu an thlen ṭhin a pawimawh thu leh Lungleia Consumer Court awm chu consumer-te'n chhawr ṭangkai se a duh thu a sawi.

Resource Person, Lunglei Government College-a Associate Professor Pu R. Lalrochama chuan, "Safe Product, Confident Consumers" tih thupui hmangin thu a sawi a. Thil siam chhuaktute chuan mipui hnena an insawi leh infak ang ngeiin thil an siam chhuak tur a nih bakah, consumer-te tana him ngei an pe chhuak tur a ni tiin, an product a ṭha tih finfiahna (certification) ISI Mark chuang ngei a ni tur a ni, a ti a. Consumer rights humhim kawnga hma lakna chu mi tinin a huhova thawh tur mamawhphurhna inṭawm a nih thu sawiin, consumer-te'n kan dikna leh chanvo ngaihtuah chungin consumer rights bawhchhiatna do leh khap beh a ṭul tih a sawi.

Vawiina hun hmanah hian sawrkar official-te, LDCA member-te, Government J. Buana College leh Lunglei Government College zirlaite an tel a. Zawhna leh chhanna leh sawi hona hun hman niin, zawhnate chu mipui mamawh petu sawrkar department hrang hrang leh mimal sumdawngte'n an chhang a ni.