676/2025-2026

Lunglei, 2025 Ṭomir thla ni 30: Kum tin May ni 31-a hman ṭhin vaihlo leh a kaihhnawih ṭhat lohzia inzirtirna ni - 'World No Tobacco Day' (WNTD) pualin vawiin khan Nursing School, Lungleiah hun hman a ni a. Lunglei District Superintendent of Police Pu J. Lalmuankima chu khuallian a ni.

Lunglei District Tobacco Control Cell-a District Nodal Officer Dr Zoramthangi Renthlei kaihhruai inkhawmah hian khuallian Pu J. Lalmuankima chuan zuk leh hmuam thil chi hrang hrangte chu a siam chhuaktute'n itawm tak leh hman chakawm tak takin a bawm leh a kawr te siam mah se, kan taksa tan a ṭha lo tih hre reng chunga hnar zel tur a ni, a ti a. Zirna in bul hnaia vaihlo leh a kaihhnawih thil zawrh khap a nih thu sawiin, sawrkar laipui aṭangin hei hi khawng zawka kalpui tura thu an dawn angin, hma lak zel a nih tur thu a sawi. 

WNTD 2025 puala hun hmanah hian DTCC Lungleia District Consultant Dr Lalnunsiama Renthlei chuan Lunglei District chhunga an hma lakna report tlangpui tar langin, kumina World No Tobacco Day thupui, 'Vaihlo kaihhnawih siamtute'n a hmangtute hip an tum dan pho lansak' tih chu a sawi fiah bawk a. DTCC Lungleia Social Worker Pu Vanlalruata chuan lawm thu sawiin hun a khar a ni.

Report-a a lan danin, nikum chhung khan District Tobacco Control Cell, Lunglei chuan awareness campaign ṭum 37 an buatsaih a. Training ṭum 4 buatsaihin, dan kalha vaihlo hmang leh zuar an awm leh awm loh endikna, Enforcement Squad Drive ṭum 78 an buatsaih bawk.

Vaihlo kaihhnawih hmangtute enkawlna hmun, Tobacco Cessation Clinic, Civil Hospital Lungleiah nikum chhung khan mi 533 inentirin, puih an ngaihna zawnah ṭanpui an ni a. Vaihlo nghei duh an ṭanpui zingah mi 111 chuan nghei hlenin, an hnena inentir zingah National TB Elimination Programme lama inentir turin mi 7 an tir a; TB enkawltute aṭangin damlo 30 chu Tobacco Cessation Cell-ah tirh an ni thung a. OPD-a inentir zingah damlo 146 chu Tobacco Cessation Cell-ah tirh an ni bawk.

Nikum chhung khan Tobacco Cessation Cell hian vaihlo nghei tum, anmahni pantute hnenah vaihlo châk chhâwkna, Nicogum strip 702 an pe chhuak tih report-ah tar lan a ni.