Vawiin chawhma khan Lunglei District Hospital OPD Complex-ah World No Tobacco Day hman a ni a. Lunglei DC charge la mek tu Pu K. Lalrohlua chu Khuallian a ni. 

Pu K. Lalrohlua chuan vaihloa kan inhnamhnawihna hian sum leh pai kawngah hmasawnna a tithuanawp in, a hmangtute hriselna a tichhia a, natna chi hrang hrang a thlen phah thin a ni, a ti a. Nu leh paten zuk leh hmuam kan tih hian kan fate nunah pawh a than hnan tlat a ni tiin, kan fate zuk leh hmuam ti lo tura kan duh chuan keimahni’n kan zir phawt a ngai a ni, a ti. Hmasawnna tluantling nei tur chuan zuk leh hmuam kan tih loh tawp hi a pawimawh ber a ni tih hre thar chungin tan la thar ila a ti a. World No Tobacco Day hlawhtlinpuitu District ni thei turin mipuite a sawm nghal a ni. 

He programme hi Dr. SR Ngurchamliana, District Nodal Officer, NTCP chuan a kaihruai a. Dr. Lalnunsiama Renthlei, District Consultant, NTCP Lunglei chuan kum 2016-17 Lunglei NTCP Report a  pe a ni. Hemi hun chhung hian school hrang hrangah awareness campaign vawi 47 nei in, tlawmngai leh Kohhran thalai pawl te tan vawi 16 an buatsaih a. Squad Drive vawi 26 nei in, hmun hrang hrang 62 an tlawh a, cigarette bawm 333 leh dan bawhchhia mi 53 te an man a ni. 

Dr. Lalsanga, Medical Superintendent, Lunglei District Hospital chuan dan phalloha zuar meizial man te tihralna hun a kaihruai a. Pi Sylvia Zomuanpuii, Psychologist, NTCP Lunglei chuan vaihlo hman that lohnate leh nghei tura hma lak dan tur zirtirna a nei bawk a ni.