Vawiin chawhma khan Agriculture Conference Hall, Lungleiah World Soil Day hman a ni a. Pu JH Lalrimawia, Addl. DC, Lunglei chu Khuallian niin Pu J. Lalzamliana, Jt. Director (Tech.), Directorate of Agriculture chu Khualzahawm a ni.

Pu JH Lalrimawia chuan United Nation Organisation peng pakhat Food & Agriculture Organisation chuan leilung pawimawhna in zirtir thar leh nan leilung humhalh that a ngaihzia phochhuak turin kum 2013 atang khan December ni 5 hi World Soil Day-ah a puang a, UNO member ten he ni hi an hmang chho ta ziah a ni, a ti a. Leilung hi kan chenna a nih mai piah lamah mihring te tana pawimawh tam tak tui khawl khawmtu, leitha pai khawmtu, leilung hausakna chi hrang hrang pawm khawmtu, mihring nunna tobul leh in nghahna chhan a ni a, heti chung hian kan leilung enkawl dan, kan hmandan leh kan tana hlutna hrechiang lo takin duh duh dan in kan sawisa kual a, hemi avang hian leilung pawimawhna leh humhalh that dan zirtirna atak a he ni ah hian pek thin a ni, a ti. Lei hrisel tak ah lo chuan thlai a tha thei lova, science thiamna hmang a leilung enkawl a, engtin nge thlai, buh leh bal kan thar tam theih ang tih hi ngaihtuah a ngai a ni, a ti a. Khawvel hausakna leh ei tur min pe tu anih avangin humhalh leh vawnhim hi kan zavai tih tur a ni, a ti bawk.

Pu J. Lalzamliana, Jt. Director pawhin thusawiin lei hi kan lo sawisa a, a hlutna kan hrelo a, mithiam ten an chhut chian chuan lei centimeter 1-a chhah siam tur hian kum 100 a ngai, a ti a. Lei a hrisel chuan thlai a hrisel a, buh leh bal a lo hrisel a, mihring in kan ei chuan kan lo hrisel phah thin a ni, a ti. Rin thu a leitha mamawh bak kan pek thin avangin lei a tichhia a, buh leh bal, thlai ten an tawrh phah tiin, buh leh bal in a lei a ngeih tur hriat chian nan soil test nei theuh turin kut hnathawktu te a chah a ni.

Pi Lalengzami Haolai, Asst. Soil Chemist, Directorate of Agriculture (CH) chuan a tarlan danin Mizoram ah Soil Testing Laboratory pathum (3) - Aizawl, Lunglei leh Kolasib ah pakhat theuh a awm a, Mobile Van pathum(3) KVK Lengpui, KVK N. Vanlaiphai leh KVK Siaha ah te pakhat theuh dah a ni a. Mizoramah Soil test turin hmun 7667 target siam a ni a, Lunglei ah chuan hmun 1678 target siam a ni a, heng atang hian kan lei that dan dinhmun a hriat theih dawn a ni, a ti.

Inkhawm hi Pu J Rothanga, DAO, Lunglei in kaihruaiin, Lunglei bikah kut hnathawktu Soil Test nei tawh chhungkua 1545 te hnenah Soil Health Card sem a ni.