3445/2024-2025
2024 Pawltlak thla ni 10: Vawiin khan Lunglei District Water & Sanitation Mission (DWSM) huaihawtin Lunglei DC Conference Hall-ah world toilet day campaign kharna leh Lunglei District chhunga vantlang inthiarna hmun, Community Sanitary Complex (CSC) ṭha lawmman semna hun hman a ni.
He hunah hian DWSM Chairman, District Bawrhsap Pi Navneet Mann chuan mipuite'n inthiarna hmun hman tlak, fai leh hriselna atana him an ngaih pawimawh theih nana world toilet day campaign kalpui chhunga PHED Lunglei te inpekna leh thawh rimna fakin, campaign hlawhtling taka an zawh theih avangin lawmpuina a hlan a. Camaign kalpui chhunga District chhunga khaw hrang hranga village WATSAN committee-te leh khawtlang mipuite ṭawiawmnaah lawm thu sawiin, campaign puala District chhunga CSC ṭha zual thlan chhuahte lawmpuina a hlan bawk a. Khawtlang mipuite'n faina, thianghlimna leh tui thianghlim hnianghnar a awm theih nana Swachh Bharat Mission (SBM) kal tlanga hma lakna an thlawp ṭhat avanga lawm thu sawiin, hma lakna chhenfakawm leh hmasawnna ṭha zawk a awm theih nan thawh hona ṭha a awm zel a beisei thu a sawi a ni.
He hun hi Public Health Engineering Department (PHED) Rural WATSAN Division (RWD) Lungleia Executive Engineer Er ZR Ṭhasangzuala chuan kaihruaiin, world toilet day campaign kalpui chhan leh hma lakna tlangpui a sawi fiah a. PHED Lungleia SBM (Gramin) District Coordinator Pi F. Lalrindiki chuan CSC ṭha zual thlan chhuah dan tar langin, Lunglei District chhunga thingtlanga vantlang inthiarna hmun (CSC) 21 aṭangin block tina block development officer-te'n an block chhunga CSC ṭha pahnih ṭheuh an thlan chhuah chu District level-a lo thlit fim leh hnuah District chhunga CSC ṭha zual pathum thlan chhuah a nih thu leh he'ng CSC-ahte hian tui hnianghnara hman tur a awm em tih te, mipuiin an hmang ṭangkai em tih leh enkawl fai a ni em tih te chu tehfung atan hman a nih thu a sawi a. He'ng tehfung hmanga CSC ṭha zual thlan chhuah pathum - Buarpui, Serte leh Ṭhaizawl khuate hnenah hian chawimawina thuziak hlan nghal a ni.
November ni 19, "World Toilet Day" pualin November ni 19 aṭanga December ni 10, 2024 inkar chhung khan mipuite'n inthiarna in ṭha leh thianghlim an ngaih pawimawh zel theih nana inzirtirna beihpui thlak (campaign) kalpui a ni a. Mimal leh vantlang inthiarna thawm ṭhat leh cheibawl hna thawh nan te, ek in him ṭha pawimawhna uar zawka inzirtirna hun atan te hman a ni.
Attachment
- Loading attachment...
