3446/2024-2025

Aizawl, the 10th December 2024: Vawiin chawhma khan Baptist Centre, Falkland, Aizawlah Mizoram Middle School Teachers Association(MSTA)chuan General Conference 2024 an nei a. He hun hi Education Minister Dr Vanlalthlana chuan khuallian niin a hmanpui.

School Education Minister chuan Middle school zirlaite chu uluk leh zuala enkawl an ngaih hun lai tak tih a sawi a. A tlangpuiin kan zirlai naupangte hi kum 10 atanga kum 14 inkar chho an ni a. Hemi kum chhovah hian an rilru nasa taka a danglam avangin zirtirtute chu an hringnun kaihruaitu an nih a ngai a. - An dil chhut (curious)-in an suangtuahna (abstract thinking) an hmang thiam chho a. A tha lama an ngaihtuahna an sen thiam nan an dil chhutna leh an suangtuahna hman an thiam tharna chu kan kaihhruai a pawimawh em em a. An zawhna tha tak leh dik taka chhansak an ngai thin a. Taksa lamah puitlin lam an pan chhoh avangin hormonal change leh mood swing te an nei chho nasa a, duat taka kan enkawl thiam te pawh a ngai viau a ni a ti.

Digital exposure an neih chhoh tak tak hun a nih bawk avangin smartphone leh social media hman dan te pawh uluk taka kan hrilh hun lai tak a ni a. Zirlai zirtirtu ringawt kan ni lo a, hringnun zirtirtu kan ni tel a ni tih kan hriat thar ka duh a. - An ‘academic career’ kaihruaitu kan nih piah lamah, an ‘life career’ kaihhruaitu pawimawh tak kan ni a ti. School Education Minister chuan Zirtirtute tan intuai thar reng a ngai a. Class kan zirtir leh naupang kum kan enkawl chu a ngai deuh reng a nih pawhin generation an danglam ang zelin thil a danglam thin a. 21st Century khawvelah hian khawvel hmasawnna hi a kal chak em em a.

Mizo zirlai ringawt ni lo, India state dang leh ram danga zirlaite aia kan zirlaite an hnufual bik loh nan zirtirtute chu kan intuai hriam thar a ngai tih kan hriat a tha a ti a. Zirtirtu a nih anga a ngaih pawimawh em em conceptual clarity (a bulthum man), critical and creative thinking (thil chikna leh ngaihtuahna danglam hman thiamna) leh, chumi puan chhuah thiamna (communication skills) chungchang pawh a sawi bawk a ni.

MSSTA Conference Program hi thenhnihah then a ni a. Chawhma lam hun chu Pu S.Rochama, Vice President, MSSTA in a kaihruai a. He hunah hian an pawl hmalakna leh dinhmun Pu C.Lalchhanhima, GS hnen atangin ngaihthlak a ni. MSSTA ah hian member 2094 an awm mek a. Kumin khawmpuiah hian an member fam ta te sunna hun pawh hman a ni. Chawhnu lam program chu MSSTA President Pu Rosangzuala Ralte in a kaihruai thunga. He hunah hian MSSTA anga hmalak na tur te sawiho leh inthlanna hunt e neih a ni a. Mizoram Teacher Federation hotuten inthlan hi an buaipui a ni.