3447/2024-2025

Khawzawl, dated 10th December 2024: Vawiin khan Food & Civil Supplies leh Land Revenue & Settlement Minister, Pu B. Lalchhanzova chuan Khawzawl DC Office leh District Civil Supplies Officer (DCSO) office te a tlawh a, chawhma dar 11 khan DC Meeting Hall-ah Khawzawl DC, Pu K. Vanlalthiana te nen meeting nei hovin office fanna hun te a neih hnuah DCSO office leh godown te a tlawh a ni.

DC Pu K. Vanlalthiana chuan meeting sawihawnna hun hmangin Minister Pu B. Lalchhanzova hnenah chuan Khawzawl district in a mamawh hrang hrang te a sawi a, land revenue and settlement office lamin clerical staff an mamawh belh thu te, chhiahkhawntu an mamawh thu te, food and civil supply lamin gas agency an mamawh belh thu te, permanent fair price shop an mamawh thu te, ration card a buaina an neih te, rural development lama mamawhna an neih te leh indaihlohna hrang hrang te a thlen a ni.

Minister Pu B. Lalchhanzova chuan DC Office pawimawh zia sawiin DC Pu K. Vanlalthiana'n department hrang hrang mamawhna a thlen kha a tih reng tur a ni tih a sawi a, district thar a nihna angin Khawzawl district hi ngaih pawimawh a tum thu leh revenue leh settlement office lama staff lak thar tum thu te a sawi a. Town planning tha tak kalpui a duh thu te sawiin land record lak nana Champhai kal reng ngai te pawh siamthat an tum zel thu a sawi bawk a. A tawpah chuan Minister Pu B. Lalchhanzova chuan hetiang sawihona hun tha tak an nei theih avangin thutkhawmnaa tel zawng zawng hnenah lawmthu a sawi a, Khawzawl district hi a department channa leh thil tul dangah thuam chaka tih changtlun zel a tum thu a sawi a ni. Meeting zawh hian Minister Pu B. Lalchhanzova chuan land revenue & settlement room te a enkual a ni.

DC Office atang hian Minister Pu B. Lalchhanzova chuan DCSO godown leh office te a fang nghal a, DCSO Pu J. Vanlalchhuanga'n fan puiin an hlawhtlinna te, an harsatna te leh an thil mamawh te a hrilh a, Minister Pu B. Lalchhanzova chuan tanpui zel a tum thu sawiin an mamawh ang ang te thlen zel turin a hrilh a, mumal tak leh dik taka buhfai sem kalpui a nih theih nan hma lak zel sawrkarin a tum thu a sawi bawk. Fair price shop siam leh ration card a an buaina lamah pawh ngaihtuahna an seng mek tih a sawi bawk a ni.