3448/2024-2025

Dated Hnahthial the 10th December, 2024: Vawiin khan Hnahthial DC Meeting Hall-ah Bawrhsap Pi Rita Lalnunmawii Pachuau kaihhruaiin District Level Monitoring Committee on Mission Organic Value Chain Development for North East Region (MOVCD-NER) thutkhawmna neih a ni a. He hunah hian MOVCD-NER phase-IV Hnahthial District chhung khaw hrang hranga kalpui anih dan tur mai bakah Organic Certification neih tangkainate sawi ho a ni.

Bawrhsap chuan Mizote thlai leh thei thar chhuahte chu organic tak ni mah se organic certification kan neih loh avangin ram pawn lama hralh chhuah dawnin market-ah kan buai thin a ni a ti a. Lo neituten an thlai tharte hralhchhuah kawnga hma an sawn dawn chuan tawngkam maia an thlai thar chhuahte thatna sawi chu a tawk lo a ni tiin ram dang mite tan pawha rin ngam theih turin certification neih that a pawimawh thu a sawi a. Lo neitute hnenah an mamawh bungrua leh thlai chi te pek mai chu a tawk loh thu sawiin hlawhtling tak tak tur chuan inhrilhhriatna leh inzirtirna tha tak in pek a pawimawh a ni a ti bawk. He huna rawn kal Future Foods hruaitute chu Hnahthial khaw chhunga an hmalak tawh chinte tha taka rawn in report thin turin a chah nghal bawk a ni.

F. Lalmuanpuia, State Project Manager, Future Foods chuan Hnahthiala MOVCD-NER hmalak tawhnate tarlangin tun dinhmunah target village pariat - South Vanlaiphai, Darzo, Thingsai, Cherhlun Khawhri, Muallianpui, New Ngharchhip leh Bualpui H te an awm mek thu a sawi a. Heng target villages atang hian a vaiin loneitu 500 thlan chhuah niin heng ho hnenah hian a tul dan azirin thlai chi sem chhuakin, inzirtirnate kalpuite kalpui thin a ni ang. Heng loneitu thlan chhuahte lo ram hi Krishi Mapper hmanga geo tag vek turin ruahmanna siam a ni.

Thutkhawmnaah hian Future Foods CEO,  Pi Mimi Lalfakawmi leh Pu Lalremsanga te telin Pi Esther Leihang, SDO Sadar ; Dr Henry Saplalrinliana, Sr. Scientist & Head, KVK, Hnahthial; Pu MS Dawngliana, DAO; Pu Lalthakima, DHO leh Pi Linda Lalduhzuali, ADAO te chu an tel bawk a ni.