3928/2022-2023

Lunglei the 22nd March, 2023 - PHE Department, Lunglei District leh North East Initiative Development Agency (NEIDA) te tangkawp buatsaihin vawiin khan khawvel hmun dangte rualin PHED Conference Hall, Lungleiah ‘World Water Day 2023’ pualin hun hman a ni. Lunglei Deputy Commissioner Pi Ramdinliani, IAS chuan khuallian niin a hmanpui. Kumin World Water Day thupui chu ‘Accelerating the change to solve the water and sanitation crisis’ tih a ni.

World Water Day, 2023 lawmna inkhawm ah hian March ni 6, 2023 a President of India atanga National Water Warrior Award dawngtu Pi HS Lalawmpuii, Sairep, Lunglei District VCP chawimawina hun hman a ni.

World Water Day hmanna inkhawm Er Ngentluanga, SE PHED kaihhruaiah Lunglei DC Pi Ramdinliani chuan khawvel changkang chho zelah ramngaw leh nungchate kan ti chereu nasa hle a, ram kan tih chhiat leh hemi avanga boruak, sik leh sa danglam nasa lutuk veng leh siamtha leh turin theihtawp a tan kan lak a tul a ni tiin scientific management of land zulzuia agriculture leh a kaihhnawih hmalaknate pawh kan kalpui a hun tawh takzet a ni, a ti a. Mizorama kan tuihna kang chat mek tihpunna kawngah mitinten tih theih kan nei theuh a ni tiin chhungkaw tin ten tui renchem taka hmang a, a theih anga ruahtui khawl khawm (rainwater harvesting) kawnga hma la theuh turin Lunglei District mipuite a ngen a. Lunglei Municipality huam chhungah bawlhhlawh paihna hmun atana ruat ni lova bawlhhlawh paih khap tlat a nih thu Lunglei DC chuan a tarlang bawk a ni.

World Water Day, 2023 lawmna inkhawm ah hian Er Lalropuia Hmar, EE PHED Lunglei, Pi Vanthangpuii, DUDO Lunglei leh Pi Mimi Lalhminghlui, District Coordinator NEIDA Lunglei ten thu an sawi bawk a ni.

Kum 1992 khan United Nations General Assembly chuan khawvelah hian tui duhkhawp leh thianghlim a awm zel theih nan tui awm sate awmze nei taka hman a tulzia leh, chumi kawnga mi zawng zawng lungrual taka kan thawh ho theihna turin March ni 22 hi World Water Day atan a ruat a, kum 1993 atang khan khawvel pum huapin he World Water Day hi hman tan a lo ni ta a ni. Kumin hian invawn thianghlim lam hawi huam telin thupui hman a ni a, thupui chu 'Accelerating Change' tih a ni a. Hei hian a tinzawn ber chu tui leh invawn thianghlim kawnga chak zawka hmasawn a ni. Kumin World Water Day campaign auhla ber tur chu tui leh invawn thianghlim kawnga hun khirh lai sut kian zel (solving water and sanitation crisis) tih a ni.