Vawiin kha zirtirtute Ni a nih angin Lunglei khawpui chhunga zirna In hrang hrangah pawh hemi pual hian hun hman a ni a, Zirtirtute Ni puala hun hmanna lian ber Gov't Higher Secondery School ah Pu Joseph.Lalhimpuia Parliamentary Secretary Education changtu chuan khuallian niin a hmanpui.

He hunah hian Pu Joseph.Lalhimpuia chuan thu sawiin, zirtirtute hi hnam rohlu an ni a, an tello chuan kan awm theilo a ni tiin, zirtirtu lak dan tur recruitment rule siamthar a nih hnuah High School bik tan a hmasa ber ni turin sawrkarin Science leh Mathematics zirtirtu tur mi za bawr vel lak thuai a tum thu te, Headmaster chungchangah pawh za-50 senior te kaisanna atan daha za-a 50 dang chu competition exam a tling te tan dah tura MPSC in ruahmanna a kalpui mek thu a sawi bawk. Heng bakah hian education bikah sawrkarin Lungleiah Infrastructure tam tak a dah bakah thawktu lamah pawh engemawzat dahbelh an nih tawh thu sawiin, NEDP atangin Higher Secondery School leh Model School te tihchangtlunna atan cheng nuai zali sawmkua dah a ni tiin, GHSS Lunglei tan pawh cheng nuai 35 dah a nih thu a sawi. Zirlai naupangte chu an zirtirtu ten theihtawp an chhuahna chu a thlawn a nih loh nan rim tak leh taima taka lehkha zir turin Pu Mahima hian a chah a ni.

GHSS Principal Pi Lalthangpuii'n zirlaite fuihna thu a sawi bawk a, zirlai naupang ten an zirtirtute chawimawina hun hmangin item hmuhnawm leh hlimawm tak tak an entir bawk a ni.