2809/2022-2023

Lunglei the 25th November 2022: Central Young Mizo Association (CYMA) leh Mizoram State AIDS Control Society (MSACS) te bultuma HIV/AIDS hluar zel tur dona kawnga hmalakna, 'Zoram Harh Rawh Campaign' kaltlanga Branch YMA te tana Mizo hnam lam leh hnam zai hmanga intihsiakna chu vawiin khan Lunglei District Level Organising Committee on Zoram Harh Rawh buatsaihin Saikuti Hall-ah neih a ni.

Khuallian District Bawrhsap Pu Kulothungan A chuan Mizorama AIDS vei an pung chak chu veiawm a tih thu sawiin, HIV/AIDS dona kawngah mitinten mawhphurna kan nei theuh a ni, a ti a. HIV/AIDS dona kawngah  mipui zawng zawngte tanrual a hun tawh takzet a ni tiin mipuite a zau thei ang bera HIV/AIDS laka inven dan leh inenkawldan chungchangte hrilhhriat an nih zel theihna turin Lunglei District mipuite thawhho puiah a sawm a ni.

Dr K. Lalhmachhuana, District Aids Control Officer & Secretary Organizing Committee chuan Mizoram leh Lunglei District-a HIV/AIDS dinhmun tlangpui report a pe a. MSACS Data atanga a lan danin April 2021 atanga March 2022 chhung khan Mizoramah thisen test (nu nau pai chhiar tel lovin) 39,820 atangin HIV positive 1601(4.02%) hmuhchhuah thar niin hemi hun chhung hian Lunglei District bikah chuan thisen test 4155 atangin HIV positive mi 160 (3.8%) hmuhchhuah thar an ni a. April 2021 atanga March 2022 chhung hian nu nau pai 20,282 thisen test atangin HIV positive mi 177 (5.45%) hmuhchhuah an ni. Hemi hun chhung hian Lunglei District ah nu nau pai 2049 test zingah HIV positive 17 (0.83%) hmuhchhuah an ni. Kumin January atanga October thla tawp thlengin Lunglei District-ah thisen test 6445 awmin an zingah HIV positive 159 (2.47%) hmuhchhuah an ni. 

Vawiin program hi Organising Chairman, Pu Donny Lalruatsanga, Additional DC Lunglei in a kaihruai a. Dorothy Rinmuanpuii, Counsellor, OST leh Jenny Lalchhuanawmi, Counsellor ART te chuan HIV/AIDS chungchang zirtirna a nei a. HIV/AIDS Testing Centre buatsaih anih bakah condom a thlawna lak theihin a awm bawk.  Pu Zothanzuala Hnamte, Secretary, Sub Hqrs YMA Lunglei chuan lawmthu sawiin hun a khar a ni.

Zoram Harh Rawh Campaign hnam lam leh zai hmanga intihsiaknaah hian Branch YMA 6 te an tel thei a, Khuallam leh Cheraw (Kantluang) bakah Mizo zai hmangtea inelna neih a ni a.  Chanmari Branch YMA chu pakhatna niin, lawmman pawisa fai Rs 50,000 leh thuziak cheimawi an dawng a. Pahnihna chu Luangmual Branch YMA niin, lawmman pawisa fai Rs 30,000 leh thuziak cheimawi an dawng a, pathumna Rahsiveng Branch YMA chuan lawmman pawisafai Rs 10,000 leh thuziak cheimawi an dawng a. College Veng, Zotlang, leh Salem Veng Branch YMA te chuan Consolation Prize an dawng a ni. 
Intihsiaknaa pakhatna dinhmun hauhtu Chanmari Branch YMA te hi State Level intihsiakna World Aids Day December ni 1 a Aizawla neih turah Lunglei District aiawhin an tel dawn a ni.

Attachment

  • Loading attachment...