2810/2022-2023
Aizawl 25th November 2022: Vawiin khan Chalfilh Group YMA te chuan an kum 25-na (Silver Jubilee) Sawleng Community Hall-ah lawmna an nei a, Rural Development Minister Pu Lalruatkima chu khuallian niin a hmanpui.
Minister chuan thu sawiin pi leh pute hunlai atangin Mizoten Zawlbukah nundan mawi - huaisenna leh tlawmngaihna - an inzirtir thin a; Zawlbuk tihtawp a lo nih khan Young Mizo Association (YMA) din lo niin, Zawlbuk ai lo awhin vawiin thleng hian khawtlang kaihruaitu ber a lo ni ta a ni a ti. YMA din chhan ber ‘Tanpui ngaite tanpui’ a nih angin midang tana tangkai, entawntlak ni tur leh tanpuitu ni thei tura inzirtir uar a ngaih thu a sawi. YMA chu pawl bik nei lo, political party leh kohhran hrang hrangte fawmkhawmtu ber a ni a, Mizo hnam tana tangkai leh chhuanawm tak a ni, a ti. A sawi zelnaah Minister chuan YMA chu hotu nei lo hruaitu nei pawl a nih angin hruaitu chuan member-te a hruai ngam a ngai a, member-te pawh hruaitute hruai theiha awm turin a fuih bawk a ni.
Khawvel hmasawnna milin Mizoram pawhin hma a sawn ve zel a, chu chuan a tha lam chauh ni lovin a chhe zawngin Mizoram pawh a nuai mek a, a bik takin ruihhloin ram nasa takin a tichhe mek a ni, a ti a. YMA ten theihtawpa ruihhlo an do thin chu lawmawm a tih thu sawiin sawrkar nen tha taka thawk dun a, ruihhlo dona kawnga hma la tlang zel turin a sawm a ni.
Minister chuan Zohnahthlak hnam hrang hrangte chu Mizoram mai ni lovin state pawn leh khawvel hmun hrang hrangah cheng mah ila chhulkhat chhuak an nih angin inhmangaihna leh inunauna tha neih zel a tul a tih thu a sawi a. Hemi kawnga CYMA hmalakna chu fakawm a tih thu sawiin state dang atanga zohnahthlak raltlante pawh kan unaute an ni tih hriain, duat taka kan enkawl leh kan chhawmdawl zel a tul a ni, a ti a. Hun lo kal leh zel turah pawh nasa zawka tang tlang zel turin kalkhawmte chu a ngen a ni.
Khuallian chuan Mizoram chu pi leh puten Mizote chenna atana an lo sual chhuah ram a nih angin a venhim hna chu keimahni kutah a innghah thu sawiin state dang nena ramri buaina kan neih chang pawha kan tanrual tlan chu pawimawh a tih thu a sawi a. Ram dinchhuahna, thanna leh hnam ral lo turin mihring tam kawngah pawh tan lak a ngai hle a ni, a ti.
CYMA President Pu R. Lalngheta pawhin thu sawiin eiruk, hlemhletna leh ruihtheih thilah Mizo te kan fihlim a hun tawh hle a, YMA Member ten mahni chhungkua leh khawtlang theuhah bul tan a ngai a ni, a ti.
Vawiin Silver Jubilee lawmna inkhawm hi Chalfilh Group YMA President Pu Ngurthansanga Sailo chuan a kaihruai a, kum 1997 ah Chalfilh Group YMA hi din niin tunah hian YMA Branch 20 lai an awm mek a ni.
Attachment
- Loading attachment...
