2454/2022-2023
Lunglei the 27th October, 2022 - Central Young Mizo Association (CYMA) leh Mizoram State AIDS Control Society (MSACS) te tangkawp buatsaih, HIV/AIDS hluar zel dona tura hmalakna, ‘Zoram Harh Rawh Campaign’ tih thupui hmanga Mizo hnam lam (folk dance) leh hla (folk song) hmanga Branch YMA te tana intihsiakna neih tur chungchangah vawiin khan Lunglei Circuit House Conference Hall-ah District Organizing Committee an thukhawm.

He hun hi Lunglei Additional DC Pu Donny Lalruatsanga’n kaihruaiin Zoram Harh Rawh Campaign Lunglei District-a kalpui dan tur sawiho anih bakah member –te tan HIV/AIDS Sensitization hun hman a ni a. Pu Robert Lalrempuia, State Program Officer, PATH/MSACS chu Resource person a ni.

Zoram Harh Rawh Campaign hi Lunglei District-ah November 15-19 chhung hian buatsaih tum a ni a. December ni 1, 2022, World AIDS Day ah State Level intihsiakna neih a ni bawk ang.

He Campaign hi a zau thei ang bera mipuiin anlo thlir theihnan Cable TV kaltlanga Live pekchhuah ni se tih Committee chuan a rel a. Social media lamah pawh zau taka puanzar tum niin Instagram, Facebook leh YouTube account te pawh siam nghal ni se tiin a mawhphurtute ruat nghal an ni a. He campaign kalpui naah hian a duh apiang ten HIV test an tih theih nan HIV Testing Unit ruahman ni se tih Committee chuan a rel bawk.