988/2026-2027 

Lunglei, 2026 Nikir thla ni 12 : District Sainik Welfare & Resettlement Office (DSW&RO), Lunglei leh Mizoram Ex-Services League (MESL), Sub-Headquarters Lunglei ṭang kawp chuan nimin, June ni 11, 2026 khan Green Mizoram Day pualin War Memorial Lungleiah thing an phun a. Lunglei District Bawrhsap Pi Navneet Mann pawhin War Memorial-ah hian Green Mizoram Day pualin thing a phun bawk.

Sainik Welfare Lungleia thawktute leh Ex-Servicemen member-te hian Lunglei War Memorial chei thar hmunah Green Mizoram Day pual hian hun hmangin, ram tana nunna hlu tak lo hlan tawhtute hriat rengna lungphun hmunhma an tihfai bakah, thing ṭiak eng emaw zat an phun a ni. 

War Memorial hmuna Green Mizoram Day pual thing phunnaah hian Lunglei District Bawrhsap Pi Navneet Mann chuan telpuiin, sipai bangte kiangah thing ṭiak a phun a. War Memorial-a thing phun chu mi huaisen kal tate hriat rengna bakah, chhuan lo awm zel turte tana environment humhalh pawimawhzia tar langtu leh entawn tur hnutchhiahtu ni se a duh thu a sawi.

Lunglei DSW&RO Major Rebecca L. Chhakchhuak chuan sipai leh sipai bangte thinlungah War Memorial chuan hlutna thuk tak a neih thu sawiin, chengrang an lo chawipui tawh, rorum tak takte huaisenna leh inhlanna  chu an hlut hle tih a sawi a. Green Mizoram Day-a War Memorial hmun ngeia thing an phun chuan ram puma sipai martar chhungte leh ṭhiante inunauna a lantir tih a sawi a. Thing phun chu Green Mizoram Day puala thil tih ringawt ni lovin, War Memorial hlutna leh mawina tihpun bakah, ram tana eng kim hlantute hriat rengna nung awmtir chu a tum pakhat a nih thu a sawi.