No.7877/2020-2021

Lunglei, 22nd March, 2021: Vawiin khan Lunglei DC Conference Hall-ah National Tobacco Control Programme (NTCP) leh National Health Mission (NHM), Mizoram te tangkawp buatsaihin zuk leh hmuam chungchang inzirtirna leh sawihona hun ‘Orientation Training for District Level Coordination Committee and other Stakeholders’ neih a ni. Training-ah hian a kaihhnawih sawrkar official-te, Lunglei District Anti-Tobacco Squad member-te, tlawmngai pawl hrang hrang aiawhte, media mi te  leh zirlai hruaitute an tel a ni.

 He huna khuallian leh Lunglei District Anti-Tobacco Squad Chairman ni bawk Pu Kulothungan A chuan Global Adult Tobacco Survey neih hnuhnung berah (2016-17) Mizoramah kum 15 chin chunglam vaihlo laka fihlim lo chu za zelah 58.7 niin India ram pumah Tripura (64.5%) dawtah chuan Mizoram kan sang ber a ni a ti a. Hetiang dinhmun anih avangin zuk leh hmuam dona kawngah hian mitinten theihtawp kan chhuaha kan tan zual sauh a tul takzet a ni tiin  COTPA, 2003 chu kan District ah pawh khauh taka kan kenkawh zel a tul a ni, a ti a. Hemi chungchanga hmalaknate chu thawk leh khata hlawhtling thut thei anih loh avangin kan tan mar reng a tul a, a bik takin naupang leh thangtharte an fihlim theihnan theihtawp kan chhuah  tul a ni, a ti bawk. Lunglei DC chuan District chhunga sawrkar pisa tinah Anti-Tobacco Committee din tura hmalak nghal anih tur thu leh Office tina mawhphurna neitute lo inruat tura Department –te hriattir nghal a, an hmalaknate District administration chuan a vil tur thu a sawi bawk.

 Vawiin training na ah hian Lunglei SP Pu Rex Zarzoliana Vanchhawng pawhin thu sawiin Pu R.Lalremruata, State Consultant, NTCP chuan Tobacco Control in Mizoram leh COTPA 2003 chungchangah zirtirna a pe a. Dr Lalnunsiama Renthlei, District Consultant, NTCP chuan 2020-21 lunglei District report a pe a ni. Dr H.Lianthangpuia, State Nodal Officer, NTCP, DR SR Ngurchamliana District Nodal Officer NTCP te pawhin he training hi an hmanpui a ni. Zirtirna neih zawhah hian zawhna leh chhanna leh sawihona hun tha tak hman chhunzawm a ni.

 Vawiin training naa tarlan angin Mizoramah zuk leh hmuam ala hluar hle a, Global Adult Tobacco Survey neih hnuhnung berah (2016-17) Mizoramah kum 15 chin chunglam vaihlo laka fihlim lo chu za zelah 58.7 niin India ram pumah Tripura (64.5%) dawtah chuan Mizoram kan sang ber a. Global Adult Tobacco Survey hmasa zawk 2009-10 ah Mizoramah kum 15 chin chunglam vaihlo laka fihlim lo chu za zelah 67.2 niin 2016-17 ah kan dinhmun hi a zia awm chho a, vaihlo hmang an tlem zel theihnan theihtawp an chhuah chhunzawm zel a ni tih NTCP hotute chuan an sawi. Sawrkar Laipuiin India ram hriselna dinhmun a zirchianna National Family Health Survey 5 (2019-20) report in a tarlan danin Lunglei District-ah kum 15 chin chunglam hmeichhia za zela 62.8 leh mipa za zela 75 chu vaihlo lakah an fihlim lo a ni.

Vaihlo do na kawngah Mizoramah hmalakna nasa tak awm mekin Chief Minister Chairman na hnuaiah Mizoram Smoke Free Group din niin Health Minister Chairman na hnuaiah Smoke Free Mizoram Coalition te an awm a. Chief Secretary Chairman na hnuaiah State Level Coordination Committee (Tobacco Control) awmin District tinah din a ni bawk a. Anti-Tobacco Squad chu Mizoram District 8 ah din a ni tawh bawk a, COTPA 2003 zawm that anih leh nihloh enfiahin Squad Drive an nei thin a ni. Tin, naupang zirlai lehkhabu Class IV (subject pakhat), Class VII (subject pathum) leh Teachers Guide (HSS) ah te vaihlo thatlohzia inzirtirna dah tel a ni a. Mizoramah khaw pathum – Thingsul Tlangnuam, Ruantang leh Thingdawl te chu Tobacco Free Village – COTPA 2003 zawm tluantling khua ah puan an ni bawk. Mizoram chu India rama State te zingah Anti-Tobacco Day hmang hmasa ber niin kum 2014 atang khan kum tin September ni 11 ah State pumah Anti-Tobacco Day hman thin a ni.