Tukin khan Lungpho Playground ah Beti Bachao Beti Padhao Serchhip District hmalakna kal zelah hmeichhe naupang Hockey a talent nei te zawn chhuahna hun (Exhibition cum Talent Search) buatsaih leh a ni a. Hmeichhe naupang thahnem takin he hun hi an chhim.

BBBP District Task Force leh Thenzawl Hockey Academy ten ruahmanna siamin tun hnaiah Khawlailung leh E. Lungdarah Exhibition cum Talent Search hi neih a nih hnuin vawiin hian Lungpho ah hian buatsaih leh a ni a. Lungpho Games and Sport Association te nen Lungpho khawtlanga hmeichhe naupang Hockey lama talent nei thate hi uluk takin enfiah an ni. He hunah hian Pi Lalrampari, Thenzawl Academy Coach chuan, tunah hian Academy ah hian India Junior Hockey Team Players te pawh an awm mek thusawiin, mizo hmeichhe naupang Hockey lama Talent nei tha an awm phawt chuan a tul anga buaipui zui zel an inhuam thu a sawi a. India Hmeichhe Team-a Player pawimawh Lalremsiami pawh he hmun atanga inzir chhuak a nih thute sawiin, naupangte chu ram tihmingthatu, khawtlang tihmingthatu mi ropui takah an inchher chhuak thei tih hre turin a fuih a. Lungpho GSA in tha taka an buaipui avangin lawmthu a sawi bawk a ni.

He hunah hian District BBBP Co-Ordinator Pi VL Remruatpuii chuan Government Lungpho Middle School te hman turin Hockey khelhna hmanrua engemawzat a hlan a ni.

Beti Bachao Beti Padhao hi Ministry of Women and Child Development, Government of India in hmeichhe naupangte venhimna leh zirna lama chher puitlin ngei an nih theih nana District huapa hmalakna a duan a ni a. He ruahmanna hnuaiah hian Serchhip District ah pawh hmalakna engemawzat kalpui mek a ni a. Hmachhawp engemawzat a la awm bawk a ni.