Vawiin khan MAL leh Mizoram Film Translator Association tangdun chuan Mizo Tawng Dik leh Tha chungchanga Inrawnkhawmna Tourist Lodge Hall, Chaltlangah neih a ni a. He hun hi Prof Laltluangliana Khiangte chuan kaihruaiin, Dr Rualkhuma Colney, MAL Secretary chuan he inrawnkhawmna neih a nih dan a sawi a.  Pu C Chhuanvawra, Vice President MAL chuan he inrawnkhawmna sawihawnna neiin Mizo tawng hman dik hi hnam humhalhna bul pawimawh tak anih avangin Mizoram Film Translator te chu hnam humhalhtu pawimawh tak leh Film an lehlin kawngah pawh dik taka Mizo tawng hmang chho zel turin a sawm a ni.

He hun sawihawngtu dang Pu Rozama Chawngthu pawhin Film lehlin kawnga Mizoram film letlingtute hnathawh chu lawmawm a tih thu leh Mizo tawng kan hman dik loh langsar zualte chu hre rana hmang dik zel turin a sawm bawk. He hunah hian Mizoram Film Translator Association lam pawh thahnem tak kalin Film lehlin kawng a harsatna an neih hrang hrang te pawh sawiin he hun hi tha takin an hmang ho a ni. He inrawnkhawmna ah hian MAL chuan Mizoram Film Translator Association te hi Mizo tawng lehlin leh thehdarh kawng an hnathawh that avangin Chawimawimawina thuchei an hlan bawk.