2085/2022-2023
Lunglei the 27th September, 2022- Lungpuizawl AH&Vety Farm, Lunglei District-a Ar awp keuna leh Ar vulhna (Hatchery cum Poultry Farm) ah Ar note 5000 (rainbow rooster) awp keu turin hmalak mek a ni a. Heng Ar note te hi October ni 1, 2022 ah keu hman tura beisei an ni. He farm-a Ar awpkeuna khawl hian ni 21 chhungin Ar note 5000 a awp keu thei a ni.

Vawiin chawhnu khan AH&Vety changtu Minister Dr K Beichhua chuan Lungpuizawl AH&Vety Farm hi tlawhin Ar note awp keu tura hmalakna kal mek te enin, thawktute’n mamawh an lo thlente a ngaithla a, chak zawka hmalak dan tur an sawiho a ni. Dr. Engkunga Chhangte, Joint Director, Southern Zone, AH&Vety, Dr. F. Lalramhluna, Principal, IAH & VTI, Lungpuizawl leh AH&Vety Department thawktu dangten anlo dawngsawng a ni.

Dr K Beichhua chuan Mizoramin Ar note leh arsa ah kan intodelh theihnan AH&Vety Department chuan theihtawpin hma a la chho mek zel a ni tiin Lungpuizawl ah Ar note 5000, leh Mampui Vety Farm, Lawngtlai District-ah Ar note 3000 awp keu theihna khawl bun tawh a nih bakah Zoram Poultry Development Society (ZPDS) enkawl Poultry Hatchery Farm, Tanhril chu tih len leh mek niin Ar 1,00,000 awp keu thei tura hmalak mek a nih thu a sawi.

Lungpuizawl Farm-a ar awpkeuna leh Broiler ar vulhna hi kum 2017-18 ah NABARD RIDF atanga Rs cheng nuai 519.25 hmuh atanga sak a ni a, Aarkon Infrastructure, Uttar Pradesh ten a sak hna thawkin nikum October ni 14 khan Dr K Beichhua hian a hawng a ni.