1626/2025-2026

Lunglei, 2025 Mimkut thla ni 26: Nasha Mukt Bharat Abhiyaan hnuaia ruihhlo do beihpui peng khat atana Lunglei Deputy Commissioner (Bawrhsap) hma lakna kal zelah, vawiin khan Lungsen Aspirational Block-ah hlawhtling takin "Ni Khat Atan BDO (Be a BDO for a Day)" tih hun buatsaih a ni a. Lungsen Aspirational Block-a zirlai naupang pali chu BDO hna thawh dan a taka an hriatna tur leh mawhphurhna pawimawh la ngam tura fuih phurtu atan BDO ṭhutthleng luahtir an ni.

Lungsen Block chhunga zirna kawnga ti ṭha leh entawn tlak zirlai pali –P. Lalrinsanga, Class IX (Govt Lungsen High School); Danny Vanlalduata, Class X (Govt Lungsen High School); Marcus Malsawmzela Apeto, Class XI (Lungsen Senior Secondary School); leh F. Ramengmawii, Class XII (Lungsen Senior Secondary School) te chu he hunah hian an tel a. Zirlaite hi Lungsen SDEO Office aṭangin BDO lirtheiin BDO Office thleng hruai niin, Lungsen BDO Pu Lalhruailiana Zote leh thawktute'n an lo dawngsawng a. BDO Office-a pindan hrang hrang an fan kualpui a ni.

Vawiin hun hmanah hian zirlaite hi BDO hna thawh dan leh sawrkar hma lakna (scheme) hrang hrangte hrilhfiah an ni a. BDO ṭhutthlenga ṭhuin, mipuite mamawh leh harsatnate an ngaithla a, chhiatna thlen thulha hma lak dan leh block hmasawnna atana ruahmanna siam dan hrang hrangte a takin an ti chhin bawk a. MzSRLM Custom Hiring Centre te, PMAY hnuaia ṭanpuina kal tlanga in sak leh MGNREGS kal tlanga hna thawhte tlawhpui an ni bawk.

Tlai lamah "Ni Khat Atan BDO" hun hman aṭanga an thil zir chhuah leh tawn hriatte inhrilh tawnna hun buatsaih niin, BDO Pu Lalhruailiana Zote chuan Zirlai-BDO-te hnenah hian thuziak (certificate) a hlan a ni.

Lunglei DC hma laknain "Ni khat atan Bawrhsap" (Be Deputy Commissioner for a Day) tih chu August ni 27, 2025 khan Lungleiah hlawhtling taka buatsaih a lo ni tawh a. He hma lakna hi DC ruahmannain block level-ah chhunzawm a ni.