1627/2025-2026

Dated Aizawl, the 26th September, 2025: Tourism Minister Pu Lalnghinglova Hmar chuan vawiin khan Tourist Lodge, Chaltlang Conference Hall-ah Tourism Department buatsaih, World Tourism Day lawmna hun chu khuallian niin a hmanpui a. Mizoram Tourism Excellence Awards 2025 chu a sem a nghal bawk.

(World Tourism Day hi September ni 27 a ni a, kumin hian Inrinnia a tlak avangin September ni 26-ah lawm niin, thupui atan ‘Tourism and Sustainable Transformation’ hman a ni.)

Khuallian Pu Lalnghinglova Hmar chuan thu sawiin, sawrkar hmalaknate leh hmachhawpte bakah khualzin veivak pun dante a tarlang a. Kum 2024-2025 chhunga khualzin za zela 139.50%-a an pung chu lawmawm a tih thu leh Tourism Department leh tourist service operator-te inpekna rah a nih thu a sawi a.

Minister chuan Mizoram sawrkarin tunhnaiah khualzinte hip nan nasa takin hma a la tih leh kum 2026 atangin festival/event langsar kan neihte awmze nei zawka kalpui a, Tourism Calendar mumal tak duan a ni tih a sawi a. Mizorama khualzin hip thei hmun mawi leh tlawh chakawm engemawzat chu thawmthata cheimawi mek zel niin, state budget pawn atangin project engemawzat kalpui mek a ni, a ti a. Nakkum atangin horticulture  lam hawia Anthurium Festival kalpui tan a nih dawn thu leh hmun nghet, Reiekah, hun nghet October kar hmasa bera hman a nih thin tur thu a puang bawk a ni.

Tourism Minister chuan agro-based tourism, ecotourism, community-based tourism a pawimawh rualin kan ram leilung mawina leh hnam zia pholan nan leh kan local economy than chak nan rel hmanga inkalpawhtawnna thar kan neih hman tangkai a ngaih thu a sawi a. Hmathlir neia concert economy leh film policy changtlung ngaihven a ngaih tih sawiin, kan thenawma hnam dangte nena inthlunzawm a pawimawh a,  kan hnam zia, mikhual chunga tha thin hnam kan nihna chawilian leh a, mikhualte tlawh chak ram kan nih theihna turin, Mizo economy siamthatna hmanrua atana tourism hmang tangkai turin kalkhawmte a chah bawk a ni.

World Tourism Day lawmna hunah hian Tourism Department Secretary, Pu V. Lalsangliana, IAS chuan kalkhawmte lawmna thuchah a sawi a. Kumin World Tourism Day thupui chu an department ngaih pawimawh zawng leh kalpui mek a nih thu leh Mizoram Responsible Tourism Policy 2020 nen pawh a inrem hle thu a sawi a ni.

Pi R. Lalrodingi, Tourism Department Director pawhin tourism sector hmanga economy tihngelngheh theih dan inkawhhmuh a pawimawh tih sawiin, kalkhawmte chu khual chhawn thiam nana an hriat tur tul, an hnuaia hnathawkte enkawl dan te, sum hman dan leh peipun dan te leh social media a tha lama hman a tulzia te hrilhin, sawrkar scheme hrang hrang, UNNATI leh Bana Kaih hnuaia tanpuina an dil theih thu a hriattir a. Rel lo luh hnua khualzin pung turte lo thleng zo tura inrin a ngaih thu leh tha thlah lova thawk turin a chah bawk a ni.

Pi C. Ramsangzuali, Tourist Officer kaihhruaiin zinmi rintlak thutiam, Responsible Travel Pledge chhamho a ni a. Pi Rachel Lalrinhlui, Tourism Department Deputy Director chuan Mizoram Tourism Excellence Awards dawngtute puangin, khuallian Pu Lalnghinglova Hmar chuan a hnuaia mite hnenah hian citation leh sumfai Rs. 10000/- a hlan a ni.

MIZORAM TOURISM EXCELLENCE AWARDS 2025 

1. Best Hotel - Royale Lalawi 

2. Best Guesthouses, Lodges, Inns etc - Rest Inn, Chaltlang 

3. Best Homestay - Giftland Homestay 

4. Best Tour Operator - Flying Christabel Tours & Travels 

5. Best Tour Guide - Lalhruaitluangi 

6. Best Travel Agent - Glory Tours & Travels 

7. Best Restaurant - Naamy 

8. Best Standalone Catering Unit - Samuel Catering 

9. Best Tourism Promoter - Tlauliana 

10. Best Yuva Tourism Club - Govt.Hrangbana College 

11. Best Two Wheeler Taxi - Lalremkima, ID No.501  

12. Best Taxi Driver - H. Laldanmawia, MZ01-N-3182 

13. Best City Bus - MZ01-AB-0080, Driver PC Lalthanmawia 

World Tourism Day 2025 lawmna hun hi Pi Lalthakimi Pachuau, Tourism Department Joint Director chuan lawmthu sawiin a khar a ni.

Tourism Minister Pu Lalnghinglova Hmar thusawia pawimawh zualte a hnuaiah hian tarlan a ni:

Table 1: Mizorama khualzin veivak punna

Table 2: Mizoram Tourism Calendar

Table 3: State Budget pawn atanga project kalpui mekte

MIZORAM ZINMI RINTLAK THUTIAM 

Zinmi rintiak nih ka intiam a; 

Hmun tlawh thar ka neih apiangin, 

Ka ke hniak bak hnutchhlah ka nel lo ang a, 

chu hmun ka hriatrengna bak ka hawn lo ang; 

Ka pawi sawi lo te lakah chuan 

pawi ka sawi bik hauh lo ang; 

Fal leh thlanghlim takin ka zin ang a, 

Ka hmun tlawha mite tihdan ka zah thiam zel ang; 

Khualzinte tlawh tlak ni zel turin

ka hmun tlawhte vawn him zel ka tum ang.