521/2025-2026

Lunglei, 2025 Ṭomir thla ni 21: Lunglei District Deputy Commissioner hma laknaa RailTel Corporation of India Limited, New Delhi aṭanga Corporate Social Responsibility (CSR) sum hmuh kal tlangin Healthy Lunglei District Campaign hnuaiah Lungsen Aspirational Block huam chhung khaw hrang hrangah inkai chhawn theih loh natna (non-communicable disease) chungchang inzirtir leh inentir runpui (NCD awareness & screening camp) kalpui mek a ni.

Healthy Lunglei District Campaign hnuaia Lungsen Aspirational Block huam chhunga hma lakna hi May ni 9, 2025 aṭang khan ṭan niin, Lunglei District health & family welfare department hnuaia doctor, nurse leh thawktute'n khaw hrang hrangah kal chilhin thisensang leh zunthlum an endik bakah, a mamawhte hnenah a thlawnin damdawi sem a ni bawk a. Campaign hi May leh June thla chhung kalpui tura ruahman niin, thisensang leh zunthlum endik zat tur atan kum 30 chin chung lam mi 3,000 aia tlem lo tinzawn a ni.

Lungsen Aspirational Block huam chhunga Healthy Lunglei District Campaign kalpui mekah hian khaw 6 - Lungsen, Zawlpui, New Vuakmual, Putlungasih, Kauchhuah leh Phairuangchhuah-ah te health camp buatsaih tawh niin, he'ng khaw 6 aṭang hian mi 141 te hriselna dinhmun endik tawh a ni a. Thisensang (hypertension) tih hriat chhuah thar 6 leh inhre sa endik nawn 39 awmin, zunthlum (diabetes mellitus) hriat chhuah thar 13 leh inhre sa endik nawn 16 an awm tawh bawk.