522/2025-2026

Aizawl the 21st May, 2025: Vawiin khan Urban Development & Poverty Alleviation Department bultumin Aizawl leh District Headquarters hrang hrangah Ministry of Housing and Urban Affairs, Government of India hnuaia AMRUT Mitra Initiative (AMRUT 2.0 in convergence with DAY NULM)-a “Ek Ped Maa Ke Nam” campaign kal zelah, Thingphun Campaign: “Women for Trees” a kalpui tan a ni.

‘Women for Trees’ campaign-in a tum ber chu hmeichhe Self Help Group (SHG)-te kaihhruaina hnuaiah thing, a tam thei ang ber, phun a ni a. Khawpui chhunga boruak thianghlim leh tui hna tha zawk kan neih theih nan thingphun theihna tura ram awl awm thei apiang; tui hna awmna bul hnai, park, Sawrkar ram leh a vel, school/college, anganwadi-ah te thingphun campaign hi kalpui tura ruahman a ni. Thingphunte hi a rei lo berah kum hnih khat tal enkawl chhunzawm tur a ni ang.

‘Women for Trees’ campaign hi Phase thum a kalpui tur a ni a:- 

Phase I - Site Identification Visit – 21st - 23rd May, 2025 chhunga neih tur a ni.

Phase II – Plantation (thingphun hun) – 5th June - 31st August, 2025 chhunga neih tur a ni.

Phase III – Survival Monitoring (thingphunte enkawl chhunzawm hun chhung) – kum khat atanga kum hnih chhung tur a ni.

UD&PA Department Director, Pu Jacob Lalawmpuia hovin Mizoram-a ‘Women for Trees’ Campaign bultanna pui ber hi Edenthar BSUP hmunah neih a ni a. He Campaign hawnna hun tawiah hian Atal Mission For Rejuvenation and Urban Transformation (AMRUT 2.0) hnuaia thawktute bakah Deendayal Antyodaya Yojana – National Urban Livelihoods Mission (DAY-NULM) hnuaia SHG member thahnem tak an thawk chhuak a ni. 

Aizawl khawpuia hmun li (4) – BSUP Edenthar, BSUP Durtlang, BSUP Lawipu leh RAY Falkland-ah vawiin leh naktuk hian UD&PA Department kaihhruainain SHG member-ten thingphunna hmun tur hi an enfel ang a. June thla chhungin thing thahnem tak phun tum a ni. District Headquarters dangah pawh he hun hi hman a ni a, UD&PA Department thawktute kaihhruainain hmun 46 ah SHG member 518-ten thing eng emaw zat phun turin hma an la a ni.