523/2025-2026

Aizawl the 21st May, 2025 : Vawiin khan Pi Lalrinpuii, Minister, Social Welfare chuan Operation Kingdom Ministry(OKM) hotute kawmna a nei a. Anni hi Phunchawngah inbengbelin ruihhlo ngaite Pathian thu zirtirna an kalpui a, thla 7/8 te an course hi a ni thin, tunah hian mi 400 an awm mek a ni. OKM hian inkaihhruaina felfai takin ruihhlo ngai sim tawhte chu Senior Resident atangin Worker ah, chuta tangin Executive ah leh OB ahte an tang chhova, an chungah hian Adviser te an awm leh bawk a. Firms & Societies Act hnuaiah in register-in mi inphalte donation pek khawm atanga kal an ni ber a. Chumi rualin anmahni zirlaite hi a huho ten an inhlawh thin a, insakna hna hrang hrangte, kawng siamna ah te, lungrem hnate an thawk thin. Vawk leh ar an vulh bakah thlai huante an siam bawk a. 

Vawiin tlailamah vek khan Minister hian TBCC founder Pu Zohmingthanga leh TBCC Advisory Board hotute kawmna hun a nei bawk a. TBCC tha zawk, langtlang zawk leh inkaihhruaina mumal zawk nena kalpui dan tur an sawiho a. TBCC lam pawh hian dan hnuaia mumal taka kal chu an duhdan anih thu leh lawmawm an tih thu an sawi. A rang thei ang bera tuna ruihhlo ngai hawna tur nei lova khawlaia tei rawlai te lo enkawl leh turin TBCC hi ruahmanna siampui a ni a. Admission mumal zawka tih leh a hmun hmain a zawh tawk damlo la turin an inruahman dawn a. TBCC advisory Board Pu Vanhela Pachuau Chairman-na hnuaiah uluk zawkin an vil tawh dawn bawk a.  

Sorkar chuan dan angin  accreditation a kalpui tawh dawn a chu dan hnuaia minimum standards zawm tur awmte an zawm theih nan Sorkarin Center te training pek a, kawng hrang hranga puih a tum thu leh Kohhran hrang hrang hruaitute pawh puitu tura sawm an nih thu Minister hian OKM leh TBCC  hotute hi a lo hrilh a. Anni lam pawhin dan hnuaia inkaihhruaina mumal tak nena kal a ni tur chu an lawm thu leh Sorkar, Kohhran leh NGO te nena thawh tlan chu an duhthusam anih thu an sawi a ni.