518/2025-2026

Lunglei, 2025 Ṭomir thla ni 9: Vawiin khan Lunglei District Deputy Commissioner Office hma laknaa mipuite'n sawrkar hma lakna hrang hrangte an chhawr ṭangkai theih nan an khuaa kal chilha service hrang hrang chhawp chhuahsakna, "I Kawtkaiah Sawrkar" (Prashasan Gaon Ki Ore) hun chu Lungsen khua leh a chhehvel mipuite tan Lungsen BDO Complex-ah buatsaih a ni.

Lungsena "I Kawtkaiah Sawrkar" hun buatsaih hi Lungsen Block Development Officer Pu Lalhruailiana Zote chuan kaihruaiin, Lunglei DC hma laknaa Lungsen mipuite'n an kawtkaiah awlsam taka sawrkar department hrang hrang dawr theihna leh an harsatna chin felna remchang an nei thei chu lawmawm a tih thu a sawi a. Lungsen chu India rama block dawm kan ngai bik, aspirational block zinga mi a nih angin sawrkar pawhin a ngai pawimawh hle tih sawiin, sawrkarin mipuite tana hamṭhatna leh ruahmanna hrang hrang a duante leh an tana hma lakna hrang hrang a neihte hlut thiam a, hmasawn nan hman tum ṭheuh turin Lungsen mipuite chu a chah a ni.

Lunglei Sub-Deputy Commissioner Pi Lalhlimpuii Pachuau chuan report pein, "I Kawtkaiah Sawrkar" programme chu Lunglei DC ruahmannain khaw hrang hrangah hlawhtling taka buatsaih a nih tawh thu leh buatsaih chhunzawm zel tum a nih thu a sawi a. Lungsen-I Village Council President (VCP) leh Lungsen-II VCP te pawhin thu an sawi bawk.

Vawiina Lungsena "I Kawtkaiah Sawrkar" tih hun buatsaihah hian office hrang hrang - Deputy Commissioner, Aadhaar & Election Branch, Health & Family Welfare, AH & Veterinary, Agriculture, Horticulture, Education, Women & Child Development (ICDS), Rural Development Block Development Office, FCS&CA (Supply), Power & Electricity Department, PHE Department leh Mizoram Rural Bank te'n stall hawngin, awlsam zawka mipuite dawr theih turin an inpho chhuak a. Electoral roll enfiah/inziah luh, Aadhaar siam ṭhat/siam thar, income/tribal/residential certificate dil, ration card siam ṭhat, bank account hawn thar, hriselna dinhmun endik & ABHA Card siam, ran entir leh hri danna pek, thei leh thlai chi sem, sawrkar scheme hrang hrang inhrilhfiah leh inziah luh leh mipuiin harsatna an thlenna hun te buatsaih a ni.

I Kawtkaiah Sawrkar programme hi January ni 14, 2025 khan bul ṭan a ni a. Lungsen hma hian Haulawng, Ralvawng, Bunghmun leh Tlabungah te buatsaih tawh niin, he'ng khaw pali aṭang hian mi 3,194-in service hrang hrang chhawp chhuahte hi an chhawr ṭangkai tawh a. May ni 14, 2025 khian Bualteah buatsaih leh tura ruahman a ni.