517/2025-2026
Lunglei, 2025 Ṭomir thla ni 8: Lunglei Municipal Council (LMC) hnuaia Traffic and Transport Coordination Committee (TTCC) chu nimin khan BoC Hall, Convention Centre, Lungleiah an Chairman, LMC Vice Chairman Pu K. Lalrinawma hovin an ṭhu khawm.
Chairman Pu K. Lalrinawma chuan commercial vehicle-te an dinna hmun tur stand siamsak an nihin, khawpui leh mipui tana remchang zawka siam rem duh a awm hunah tihdanglam theih tawh loh khawpa hauh ngheh bur awm lo se ṭha a tih thu a sawi a. Khawpui chhunga lirthei hunna hmun tur, parking area chu a tlangpuia ruahman fel a nih tawh laiin, thawktu indaih lohna avangin a taka kalpui a la harsa tih a sawi.
LMC Chief Executive Officer Pu Donny Lalruatsanga chuan pawl ṭhenkhat leh SP Lunglei aṭanga parking area rawtna hrang hrang awmte tar langin, parking fee aṭanga sum hmuh ang ang chu mipuite tana hmang vek turin LMC-in a ruahman thu a sawi a. LMC Secretary Pi Zoramdini chuan veng ṭhenkhata parking area an enfiah dan leh harsatna awmte report a pe bawk.
TTCC ṭhut khawmah hian Lunglei khawpui chhunga commercial vehicle stand hrang hrang awm mek leh ruahman thar turte thlir ho niin, ennawn ngaite chu a hmunah zir chianga ennawn leh ni se, tih a ni a. Kum 2024-2025 chhung khan parking fee aṭangin cheng nuai 18.31 (₹ 18,31,349/-) hmuh a nih thu tar lan niin, hemi aṭang hian LMC-in a ruahman angin traffic kaihhnawih hrang hrang tihchangtlun nan leh kawngpui chhinchhiahna (marking) siam nan ₹ 4,86,275/-hman tawh a nih thu tar lan a ni a. Sum hman bang cheng nuai 13 chuang la awm hman ṭangkai dan tur te sawi ho leh ruahman nghal a ni bawk.
