516/2025-2026

Lunglei, 2025 Ṭomir thla ni 8: NITI Aayog hnuaia aspirational block zinga mi, Lunglei District chhunga Lungsen Rural Development (RD) Block huam chhunga HDFC Bank Corporate Social Responsibility (CSR) sum hmanga hmasawnna huapzo leh tluantling a awm theih nana hma lakna, Holistic Rural Development Project (HRDP) kalpui mekah kum 2024-2025 chhung atana hma lakna tur ruahman chin chu ṭha tak leh hlawhtling taka zawh fel a ni.

Lungsen RD Block hi aspirational block (block dawm kan ngai) a nih angin Lunglei District thuneitute chuan sawrkar ruahmanna awm sa hmanga hmasawnna tur bakah, pawn lam aṭanga hma lakpuitu tur dapin, HDFC Bank CSR kal tlangin Society for Action in Community Health (SACH), New Delhi te nen Lungsen Block chhunga khaw 10-ah thla 36 (kum 3) chhung atan HRDP kalpui turin ruahmanna siam a ni a. HRDP hnuaiah hian hma lakna peng hrang hrang - thiam thil inzirtir leh mipui khawsak chawi kan te, thei leh thlai chin lama hma lak te, sumdawnna lam tihhmasawn te, hriselna leh faina lama hmasawn te, ni tha chakna hman ṭangkai te, zirna in leh anganwadi tihchangtlun te, khawtlang thawh hona tihchak leh sum leh pai enkawl thiamna inzirtir te kalpui tura ruahman niin, a thawh khatna atan November 2024 leh March 2025 inkar chhung khan hma lakna hrang hrang chu hlawhtling taka kalpui a ni.


Lungsen RD Block huam chhunga HRDP hma lakna hi khaw 10 - Lungsen-I, Lungsen-II, Rangte, Chawngte 'L', Lungrang 'S', Rualalung, Upper Lungrang, West Rotlang, Chhumkhum leh Phairuangkai-ah te kalpui niin, he'ng khaw 10-ahte hian solar street light 15 ṭheuh (a zavaiin solar street light 150) vuah fel tawh a ni a. Khaw 10-ah hian vawk vulh tur beneficiary 3 ṭheuh thlan niin, a in saksak an nih bakah, vawk note 4 (a pa 1 leh a pui 3) ṭheuh pek an ni a; ar vulh tur beneficiary 3 ṭheuh thlan ni bawkin, a in saksak an nih bakah, ar note (broiler leh rainbow rooster) 80 ṭheuh pek an ni bawk a. February ni 10 leh ni 11, 2025 khan vawk leh ar vulh tura thlan mi 60 te tan hian veterinary lam mi thiamte nen hlawk zawka ran vulh dan tur zirna (capacity building training) buatsaih a ni.

Kum 2024-2025 chhung hian khaw 5-ah sikul pakhat ṭheuh, a zavaiin sikul 5 - Government Middle School, Lungsen-I; Government Primary School, Lungsen-II; Government Middle School, Phairuangkai; Government Middle School, Rualalung leh Government Middle School, Lungrang South te chei ṭhat hna thawh niin, library lehkhabu leh infiamna bungruate pek an ni a. Khaw 3-ah anganwadi centre (AWC) pakhat ṭheuh, a zavaiin AWC 3 - AWC-XI, Lungsen-I; AWC-IV, Lungsen-II leh AWC-I, Rangte te chei ṭhat niin, naupang infiamna hmanrua leh bungraw hrang hrang hmanga tihchangtlun a ni bawk.

HRDP kalpuina khaw tinah hian mipuite zirtirtu tur Community Resource Person (CRP) pakhat ṭheuh ruat niin, February ni 25, 2025 khan CRP training leh tui leh faina leh hriselna lam inzirtirna - WASH (WAter, Sanitation and Hygiene) training buatsaih a ni a. Khaw 10-a kut hna thawktu 10 ṭheuh thlan chhuah (an zavaiin kut hna thawktu 100) te tan Krishi Vigyan Kendra (KVK) Hnahthial nen ṭang kawpin April ni 15 leh ni 17, 2025 khan hlawk leh daih rei zawka lo neih dan tur zir hona (orientation on sustainable agricultural practices) buatsaih a ni bawk.

Lungsen RD Block-a HRDP hma lakna tur hi March ni 25, 2025 khan hawn a ni a. Kum 2025 April aṭanga kum 2026 March inkar chhunga hma lakna turah DC office, SACH, HDFC Bank leh line department te nen ruahmanna fel tak siamin, hma lak ṭan leh mek a ni.