934/2023-2024

Champhai, the 26th June, 2023: Vawiin chawhma dar 11:00 khan Khawzawl DC Conference Hall-ah District Deputy Election Officer Pu Lalfakzuala, Addl. DC ni bawk chuan Lungtan Village Council Bye-Election atana Draft Electoral Rolls 2023 a tlangzarh.

Draft Electoral Roll tlangzarh taka a lan danah chuan Lungtanah hian In 126 awmin, vote nei hmeichhia 228 leh mipa 217, an vaiin 445 an awm a. Mipa aiin hmeichhia an tam zawkna chu 11 a ni.

Lungtan VC By-election Draft Electoral Roll tlangzarhnaah hian Political Party hrang hrang aiawh, Election Officer, MPF aiawh leh Lungtan VLO te an tel a ni.

Ruahman dan chuan vawiin June ni 26, 2023 hian draft roll tlangzarh a ni a. Naktuk June ni 27, 2023 atanga July ni 11, 2023 thlengin thu thlen duh neite tan claims & objections period hawn a ni a, hemi hun chhung hian roll-a inziaklut tura dilna leh thu thlen duh neite tan hun hawn a ni ang a. July ni 17, 2023 thleng hian dilna lut leh siamthat tulte hearing kaltlanga chinfel vek hman tum a ni a. Lungtan VC By-Election neih huna hman tur VC Electoral Roll thar ber chu July ni 18, 2023 hian tlangzarh tum a ni.

Lungtan hi VC Member pathum awmna a ni a. VC Member pakhat (General) a boral avangin he seat khat ruak mek hnawh khahna turin Mizoram State Election Commission chuan By-election buatsaih tumin ruahmanna a kalpui mek a ni.