933/2023-2024
Champhai, the 26th June, 2023: Tunhnaiah Champhai District chhungah vawk damlo leh thi an awm leh tak nual avangin District Magistrate, Pu James Lalrinchhana chuan Sec. 144 CrPC, 1973 (Act II of 1973) in thuneihna a pek angin vawk natna hri a darh zel lohna tur leh hemi laka District a him zel theihna turin a hnuaia khapna thupek hi a chhuah:
1) Champhai District chhungah ram dang leh state dang atanga vawk, vawksa leh vawksa atanga siam reng reng lakluh phal a ni lo
2) District dang atanga vawk, vawksa leh vawksa atanga siam lakluh leh District danga thawn chhuah khap tlat a ni
3) District chhung veng dang/khaw dang atanga vawk, vawksa leh vawksa atanga siam lakluh leh thawn chhuah phal a ni lo
4) Vawk damlo talh khap tlat a ni
5) Vawk damlo a awm chuan dah hran vat a, vawk thi reng reng thuk taka phum tur a ni
6) Vawk thi leh damlo an awmin A.H. & Vety Official-te hriattir vat tur a ni.
He thupek zawm lo tu chu IPC Sec 188 hmanga hrem an ni ang. He thupek hian chhuah a nih atanga thlahnih (2) chhung a huam ang.
