932/2023-2024

Aizawl 26^th June 2023: Vawiin khan Information & Public Relations Minister bialtu MLA ni bawk Pu Lalruatkima chuan Govt. Gairigaon Primary School building zauhna MLA Fund cheng 6,49,000 seng a sak chu a hawng a, Govt. Dinthar High School-a tlawh nghal bawk. Minister hi Dinthar Local Council leh NGO-hruaituten an tawiawm a ni.

I&PR Minister chuan Govt. Gairigaon Primary School building zauh sak thar hawnna inkhawmah thu sawiin, Local Council leh NGO-te thahnem ngaihna leh inpekna zarah school building tha tak Dinthar veng in an nei thei chu lawmawm a tih thu tarlangin, MLA Fund hmanna ah chuan a lungawi thlak hle a ni, a ti. Mizoramah tawng pathum-English, Hindi leh Mizo tawng a zirna sikul a tam lo hle a, Gairigaon School-in tawng chi thum a naupang an zirtir thin chu ropui tiin, Primary School chu naupang tan tawng zir leh thiam awlsam hun lai tak anih avangin he school atang a zirchhuakte tan a hlawkthlak in, naupangte an vanneih bik hle a ni, a ti.

Zirna hi ram leh hnam dinchhuahna pawimawh tak a ni a, khawvelah zirna hian tawpni a nei lo a, mihringte chu inzir reng tur an nih ang takin zirna chawisan kawngah mitinin tan lak a ngai a, a bik takin nu leh pa ten fate thiamna zirtir kawngah mawhphurna pawimawh tak an nei ve tih a sawi. Minister chuan nu leh pate chu an fate enkawl kawngah tan la tur leh thiam taka enkawl thin turin a chah a. Hlawhtlinna sang zawk chang turin taima leh rim taka thawh a ngai a, nu leh paten zirtirtu kutah chauh dah lova mahni fate taihmak, thawhrim leh huaisenna kawngah zirtir fo turin a sawm a ni.

Pu Lalruatkima chuan Gorkha te chu hun rei tawh tak atang a Mizorama cheng tawh annih avangin ram hmangaihna thinlung lian tak an nei a ni tiin  Mizoramin hmasawwnna rahbi thar a rah theihna tura theihtawp a thawk chhunzawm  zel turin a chah a. Mizote leh Gorkha-te inkarah  inunauna tha tak a awm a, he inunauna hian rahtha a chhuah fo thin a ni a tiin  lungrual taka Mizoram hmasawnna atana thawpuiah a sawm nghal bawk.

Govt. Gairigaon Primary School hi kum 1962-ah din niin building zauh takah hian class room pali a awm belh a. Tun dinhmunah zirlai naupang-115 leh zirtirtu-6 an awm mek a ni. Minister hian school tan whiteboard pathum pe nghalin, inthiarna (toilet) sak belh ngai pawh Education Minister hnenah a thlen tur thu a sawi bawk a ni.

I&PR Minister hian Dinthar High School-a tlawh nghal a, zirlai naupangte hnenah thusawiin Pu Lalruatkima chuan zirna hi engkima hmasawnna a ni tiin lehkhathiam tan chuan eng hna pawh thawk se angaihna an hriat avangin hlawhtlinna an chang mai thin a ti a. Zirlaite chu taima leh rim taka thawk turin a fuih a ni. Tun laiah zirlai zingah chanchinbu leh lehkhabu chhiar thin an tlem sawt hle nia ahriat thu sawiin zirlaite chu uar zawk a lehkha chhiar turin a chah a. Social Media hmanna kawngah fimkhur tura chahin an zirlai tana tangkai bakah chuan Social Media khawih tam lo turin a chah a ni.

Zirlaite zingah nu leh pa zahna a tlahniam hle nia ahriat thu sawiin Pu Lalruatkima chuan eng dinhmunah pawh dingin, eng hna pawh thawk se zirlaite chu an nu leh pa te theihnghilh lo turin a chah a, nu leh pa chawimawi thiam apiang mipuitling tak takah an chhuakfo a ni tiin zirlaite chu an nu leh pa te zah a, chawimawi tur leh fahrin manhla tak ni turin a sawm bawk.

Minister chuan khawvela hna zahawmber pakhat chu zirtirtu hna hi a ni tiin zirtirtute chu naupang zirtirna kawngah thahnem ngai fo turin a chah a. Nakina Mizoram hruaitu tur chherchhuaktu an nih avangin zirtirtu te chu taima tak a thawk tur leh hmangaihna nen a zirlai naupang enkawl thin turin a fuih a ni.

Bialtu MLA Pu Lalruatkima chuan Zirtirtu leh zirlai naupang ten ‘Study Tour’ an neihna tura a tul anga hman atan cheng 50,000 a hlan nghal bawk.

Dinthar High School hi kum 1989-ah din niin tun dinhmunah zirlai 45 awm mek in zirtirtu-8 an awm a ni.