931/2023-2024

Champhai, the 26th June, 2023: Vawiin chawhnu dar 4:00 khan Champhai District Bawrhsap Pu James Lalrinchhana chuan I&PR Conference Hall, CHANEM-ah Undivided Champhai District atanga Press Accreditation hmu thar mi 14 te hnenah Press Accreditation Card a hlan. Heng bakah hian MJA Member thar 3, Champhai atanga 2 leh Khawzawl atanga 1 te hnenah lawmpuina thilpek a hlan bawk.

Press Accreditation Card semchhuah inkhawm DIPRO Champhai Dr. Lallawmkima kaihhruaiah Pu James Lalrinchhana chuan Champhai District atanga Journalist 11 leh Khawzawl District atanga 3 te'n Press Accreditation Card an dawng leh MJA Member thar 3 te chu a lawmpui thu sawiin, sawrkarin a pawmpui leh rihtlak an nihna vawngnunga thu dik leh rintlak chhawpchhuah kawnga tan la sauh sauh turin a fuih a. Sawrkarin Journalist-te tangkaina leh hmalakna a hriatpui thu sawiin, tunlai social media chak tak leh thu thang tam tak awmnaah an tawnhriatte hmang tangkaia thu belhchian dawl mipui hrilhhre thin turin a chah a. Journalism chungchanga zawm tur awmte tha taka zawm tur leh zirchiang fo tur te, tunlai thiamnate ngaihvena insiam danglam hrehlo turtein a fuih a. Journalism hre lo leh inkaihhruainate zawm lova duh dan ang anga thu thehdarh thin a him loh thu pawh sawiin, Journalist-te chu hemi ven leh mipuite zirtirna pek kawngah theihtawp chhuah turin a chah bawk.

Pu James Lalrinchhana chuan MLA General Election 2023 kan hma lawka a awm thu sawiin, Journalist-te chu inthlanna muanawm leh felfai tak neih a nih theihna tura Election Official-te tawiawma mipuite zirtirna pek kawnga thlawp zel turin a chah a. Champhai District chhunga sawkar hmalakna, thu leh hla hrang hrangte media kaltlanga tha taka puanzar a ni thin chu lawmawm a tih thu sawiin, theihtawp chhuahtu media mite fakawm a tih thu a sawi a. Mipui sukthlek dik leh huai siam tura theihtawp chhuahpui tur leh District hmasawn nana theihtawp chhuahpuiah a sawm a. An hamthatna awm theite dap leh tul dang bawhzui kawngah finchhuah thin turin a ngen a. Harsatna an neihte inthlahrung hauh lova thlen zel turin a chah nghal bawk. Press Accreditation Card chuan mawhphurhna lian tak a kentel avangin a vawngtu theuhte chu mawhphurhna hlen chhuak tura tan la theuh turin a chah bawk.

Thusawitu dang MJA Champhai District Vice President, Pu Lalhlupuia chuan Undivided Champhai District chhunga media inzarpharh dan sawifiahin, Cable TV 2 leh Daily Newspaper 5 a awm mek thu a sawi a. MJA Champhai District hnuaia Journalist 14 in Press Accreditation Card an dawn avangin sawrkar chungah lawmthu a sawi a. Sawrkarin an tana Press Tour, damloh nikhuaa inenkawlna leh hamthatna dangte a duan thu a tarlang a. Nodal Department I&PR Department nen thawhhona tha tak an neih thu a sawi bawk.

Mizoram sawrkar hnuaia Press Accreditation Committee thukhawmin Accredited Journalist ni thei tur a thlan zingah Undivided Champhai District atangin mi 14 an tel a, heng zinga mi 11 te hi Champhai District amite niin, 3 dangte chu Khawzawl District amite an ni. Press Accreditation Card hi kum hnih chhung (March 2023- March 2025) a nung dawn a ni.

Vawiin Press Accreditation Card semna hun hman zawhah hian inkawmhona neih chhunzawm a ni a, Bawrhsap hovin District media hmasawnna tura thil tul leh pawimawhte sawiho a ni.