930/2023-2024

Lunglei the 26th June, 2023 - Vawiin khan International Day Against Drug Abuse and Illicit Trafficking pualin Saikuti Hall, Lungleiah Health & Family Welfare Minister Dr R. Lalthangliana hovin hun hman a ni a, kuminah hian “Mihring ngaihven hmasak: Thinhrikna leh thliarhranna tih tawp a, invenna tihchak” tih chu thupui atan hman a ni.

Vawiin program hi District Level Committee on Nasha Mukt Bharat Abhiyaan leh District Level Committee on Ruihhlo Do te tangkawp buatsaih niin Lunglei District huamchhunga Ruihhlo Do runpui hmalakna hawnna neih nghal a ni bawk a. Zirlaiten Lunglei khawpui chhung hmun hrang hrangah Ruihhlo Do Rally kawngzawh neiin Ruihhlo laka fihlim tura intiamna Signature Campaign hlawhtling taka neih nghal a ni.

Health & Family Welfare Minister Dr R. Lalthangliana chuan Mizoram chu ziak leh chhiar thiam tamna lamah te, NITI Aayog ina State-te hmasawnna an tehna ah te, Infant Mortality Rate-ah te India rama ti tha ber State kan nih laiin Cancer, HIV/AIDS leh ruihhlo hluar lamah te India rama a hmahruaitu kanla ni mek hi a lungchhiat thlakin a veiawm takzet a ni tiin, ruihhlo do kawnga kan hmalaknate tha thlah lova beihpui kan thlak chhunzawma tul takzet a ni, a ti a. Zirlai kalkhawmte chu an nun uluk hle tur leh Ruihhlo chi hrang hrang, a bik takin damdawi chu vawi khat tih-ah pawh a ngawl vei mai theih a nih avangin ti chhin lo tur leh a laka inthiar fihlim tlat turin zirlaite chu a chah a. Mizorama Ruihhlo do kawnga Kohhran,YMA leh NGO pawl hrang hrang te, department leh mimal te thahnemngaihna leh thawhrimna fakawm a tih thu sawiin Social Welfare Department hmalaknaa Mizoram puma Ruihhlo Do beihpui thlak kalpui mek chu a hlawhtlin ngei theihnan theihtawp lo chhuah chhunzawm turin kalkhawmte a sawm a ni.

Vawiin program hi Lunglei DC Pi Ramdinliani’n a kahruai a. Lunglei SP Pu Rahul Alwal in kalkhawmte lawmna thu sawiin, Pu Ch. Lalhruaitluanga, WADA leh Pi Lalrinkimi Hmar DCPO ten thu an sawi a. Excise & Narcotive Department SDub Inspector Pu T. Vanlalfinga chuan powerpoint presentation hmangin ruihhlo that lohna te zirtirna a pe a ni.

International Day Against Drug Abuse and Illicit Trafficking puala Poster Making Competition lawmman pawh sem nghal a ni.

1st – Electric Veng Branch YMA – Rs 5000 + Certificate

2nd – Zohnuai Veng Branch YMA – Rs 3000 + Certificate

3rd – Sethlun Veng Branch YMA – Rs 2000 + Certificate

4th – Zobawk Venglai Veng Branch YMA – Rs 1000 + Certificate

Kohhran, NGO, School, College leh Department hrang hrang tangkawp te chuan Lunglei District chhungah Ruihhlo Do Campaign ngawrh takin an kalpui chho mek zel a. Zirna in leh kohhran hrang hrang ah te campaign hi neih chhoh mek a ni.