929/2023-2024

Champhai, the 26th June, 2023: Vawiin chawhma dar 11:00 khan khawvel pum huap ruihhlo hmansual leh tawlhruk dona ni, International Day Against Drugs Abuse and Illicit Trafficking 2023 pualin Law & Judicial Minister Pu T.J. Lalnuntluanga chuan Champhai District Police te'n October 2022 atanga February 202 thla thlenga ruihhlo an man, tualchhung rate a cheng vaibelchhe 3.78 hu a halral.

International Day Against Drugs Abuse and Illicit Trafficking, 2023 pual hian District Hospital Complex-ah hun hman niin he hun hmanpuitu Law & Judicial Minister Pu T.J. Lalnuntluanga chuan ruihhlo hi kan ram-ah chauh buaipui a nih loh thu leh khawvel huapa buaipui a ni tih a sawi a. Ram leh state thenawma ruihhlo nasa taka buaipuitute leh sum ngainate avangin kan ramah ruihhlo a lo lut a, ramin kan tuar ta a ni a ti a. Minister chuan ram dinhmun siam tha turin sumdawnna thianghlimlo thlak a ngaih thu sawiin, border trade kalpui mekah hemi hrula ruihhlo tawlhruk thinte do kawngah ngaihtuahna sen tlan a pawimawh thu a sawi bawk.

Pu T.J. Lalnuntluanga chuan kan tu leh fate luah tlak ram kan siam theihna tur chuan khawtlang leh District ang chauh ni lovin a ram anga ruihhlo do hi buaipui a ngai tih a sawi a, ruihhlo dona kawnga ministry hmasa in a lo buatsaih tawhte chu thuam that zel a nih thu a sawi a. Hnam anga rohlu kan neih - YMA leh VDP te'n Force mite tha tichak tura hah taka hma an lo lak thinna chu fakawm a tih thu a sawi bawk. Ruihhlo a bikin, damdawi ti tawhte'n sim leh an harsat zia sawiin, kum 20 an nghei hnuah pawh an lung a la leng thin tih a sawi a. Thalai lo awm zel turte tan thil hlauhawm tak a nih avang leh hnam anga min chimral theitu a nih avangin kohhran, khawtlang, tlawmngai pawl leh force mite nasa leh zuala ruihhlo do kawnga tanrual a tul thu a sawi a. Champhaiah ND&PS Act ngaihtuahtu tur Special Judge Court a hrana dah a nih theihna tura hma lak mek a nih thu leh tih tur tul hrang hrangte tihfel mek a nih thu a sawi bawk.

Thusawitu dang District Bawrhsap Pu James Lalrinchhana chuan International Day Against Drugs Abuse and illicit Trafficking hi UN hriatpuina in khawvel pum huapah hman thin a nih thu a sawi a, he ni hi ruihhlo dona kawnga infuihtharna hun atan te, mipui vantlangte hnena drugs hmanga sumdawnna leh hmansualna pawi theihdan inzirtirna hun atan te, khawtlang tanhona hun leh drugs dona kawnga kalphung tha zawk duanchhauhna hun atante hman thin a nih thu a sawi a. Champhai District ah pawl hrang hrang leh Kohhran hrang hrang bakah Force mite drugs do kawngah an tang hle tih sawiin, drugs ti thar an awm loh theihna turin khaw hrang hrangah inzirtirna hun tunhnaiah pawh neih fo a nih thu a sawi a. Ramri venga district chhunga theihtawp kan chhuah hian India rama drugs lut tur tam tak kan venghim dawn tih sawiin, Nasha mukh Bharat leh ruihhlo do pawl te leh force mite thawhrimna fakawm a tih thu a sawi a. Zirlaite chu nakina kan ram hruaitu turte an nih avangin kan district leh ram hmangaihna neia hmasawn zel turin a sawm a ni.

He hun hi Pu Lalrinpuia Varte, District SP chuan kaihruaiin Police officer ruihhlo do kawnga titha mi 20 - Inspector 2, SI 6, ASI 4, Head Constable 1, Naik 1 leh Constable 6 te hnenah chawimawina hlan a ni a, Govt. GM Higher Secondary School-a On the Spot Slogan Writing Competition an buatsaih a titha zual 10 thlanchhuahte hnenah lawmman sem a ni bawk.

Pu F. Lalrinmuana, President SYMA Champhai hnen atangin ruihhlo do pawimawhna leh a tulna kawng hrang hrang ngaihthlak niin Damdawi leh ruihhlo man kawnga Police thawhpui tha, Mualkawi VDP, Khuangleng VDP leh Hnahlan VDP te hnenah chawimawina hlan an ni a, Pu Gaurav Tyagi, SDPO in lawmthu sawiin hun a khar a ni.

He hunah hian Champhai Police-te ruihhlo man, Heroin Kg 12.5, cheng nuai 6175 man hu te, Crystal Methamphetamine kg 20, cheng nuai 6000 man hu te, Ganja kg 6.35, cheng 9,525 man hu te, Alprazolam mum 450 leh cheng 4,500 man hu te halral a ni a, ruihhlo halral tak te hi tualchhung hralhnaa cheng nuaih 378 sing 2 sang 6240 man hu niin international hralhnaa cheng vaibelchhe 121 nuai 75 sing 1 sang 4 leh 25 man hu a ni. Hetih mek lai hian District Level Disposal Committee-in dan anga a tihral theih loh Heroin Kg 12.32 chu High Level Disposal Committee, Aizawl-ah halral tura thawn thlak a ni bawk.