928/2023-2024

Lunglei the 26^th June, 2023 – Health & Family Welfare Minister Dr R. Lalthangliana chuan vawiin khan Lunglei Municipal Council (LMC) Office, Convention Centre tlawhin LMC Councillor-te leh official-te inkawmhona hun a hmanpui a ni.

Minister hi Lunglei HPC Vice Chairman Pu Lawmawma Tochhang, Additional DC Pu Donny Lalruatsanga leh official dangten tawiawmin LMC Chairman Pu Lalzuithanga, CEO Pu H.Lalhmingthanga leh Councillor dangten an lo dawngsawng a ni.

Dr R. Lalthangliana chuan hun rei tak atanga kan lo nghahhlelh tawh Lunglei Municipal Council a taka a ding thei ta chu Mizoram pum tan hmasawnna ropui tak a ni tiin LMC Councillor tharte chu a lawmpui takzet thu a sawi a. Lunglei khawpui an enkawlna kawngah hmathlir thui tak nei tur leh India rama Municipal Corporation/Council-te hnathawh dan leh kalpung tha te zirchianga, Lunglei khawpui mila Regulations-te uluk taka duang turin a chah a ni.

A sawi zel naah Commerce & Industries Minister chuan Bangladesh nena kan insumdawn tawnna chu Kawrpuichhuah ICP kaltlangin tih puitling thuai tum anih thu te leh hemi tur hian Land Ports Authority of India chuan DPR cheng nuai 52,000 sawrkarah an thehluh tawh thu te a sawi a. Hemi bakah hian Zorinpui leh Zokhawthar chu India rama Trade Centre 20 thlanchhuah te zingah an tel thu a sawi a. Heng border trade hmalakna te hian Lunglei District chu thui taka a nghawng tur thu sawiin ei leh bar intodelhna kawngah te leh ram danga thawnchhuah tur siam chhuah leh tharchhuah kawngah te tun atanga tan kan lak a ngai takzet a ni, a ti a. An hmalakna kawng hrang hranga mamawh an neihte sawrkarah thlen vat thin turin a chah bawk a ni.

LMC Chairman Pu Lalzuithanga chuan vawiin inkawmhona hi kaihruaiin Lunglei khawpui enkawlna kawnga Regulations hrang hrangte chu uluk taka an duang mek thu leh naktuk 27/06/2023 (Thawhlehni) hian LMC Board of Councillors meeting hmasa ber neih a nih tur thu a sawi a. LMC Councillor-te hian May thla chhung khan Chief Minister Pu Zoramthanga leh Sawrkar hotulu dangte leh Department hrang hrangte an tlawh chhuah thu sawiin karleh hian Administrative Training Institute (ATI)-ah training an neih tur thu te a report a. An mawhphurna hrang hrangte tha taka hlen chhuak ngei tura theihtawp an chhuah mek thu te leh chak zawka hma la tura staff an mamawh belh thu te Minister hnenah hian alo thlen a ni.