Environment, Forest and Climate Change Department chuan Lungzarhtum rama Ramsial/Sele ni a hriat, tun hnaia chanchinbu leh Social Media hrang hranga “Sial pangngai” emaw “Sial thlah” emaw ni anga sawi awm chungchangah a hnuai ami ang hian thu chhuahin, zirchian mek a nih thu te leh harsatna tawkte pui tura hma lak a nih dan te tarlan a ni:

Lungzarhtum rama Sele hi “Gaur” ho zinga sub-species chi khat, “Bos gaurus laosiensis” (Myanmar leh Laos inkar chauha awm ni a ngaih) ni ngeia lang a ni a. A species dik tak tih chian nan hian a DNA test turin a ek (dung) sample hi EF&CC Department-in la in, ni 24.10.2017 khan College of Veterinary Science & Animal Husbandry (CVS&AH), Selesihah leh Mizoram University-ah te pek a ni a, a result hi nghah mek a ni. A ek sample atang hian a DNA hi duh angin a test theih ngei ang tih a chian loh avang leh a theihloh palh thulhah sample dang (thisen, tisa, hmul, chil) la leh turin ruahmanna siam mek a ni bawk. Chumi ti tur chuan kah mut a ngaih tawh dawn avangin damdawi tul ang angte hmunpui lam atangin chah mek a ni a, reiloteah lo thleng tura beisei a ni. Hetianga thisen (blood sample) atanga DNA endik theih a nih chuan he Ramsial/Sele dinhmun dik tak hi a hriatchhuah theih ngei dawn a. EF&CC Department, Dr. Senthil Kumar (MZU) leh Dr. Ravindran (CVS&AH) ten hemi chungchang hi an umzui zel a ni.

He Ramsial avanga mipuiin harsatna an tawh mek tih kian nan kawngpui bul hungna/fencing leh bawngpui neitu bawnghnute sawr theilo zangnadawmna pek dan tur pawh EF&CC chuan a buaipui mek a ni.

Ramsial hi Wildlife (Protection) Act 1972 in humhimna sang ber Schedule-I hnuaia a dah angin EF&CC department chuan a humhalh tlat a ni.