No.3990/2021-2022

Aizawl the 14th, February' 2022 : Vawiin chawhma khan Civil Hospital Lungleiah Association for Voluntary Blood Donation (AVBD) , MSACS leh Blood Bank Lunglei te tangkawp buatsaihin Valentine's Day 2022 pualin a duh apiang te tan thisen pek runpui hawn a ni. Blood Donation Camp thupui hi " Show Love, Give Blood" Thisen pe in, I hmangaihna lantir rawh" tih a ni.

 Blood Donation Camp hawnna hun hi Pu Lalrotluanga, Executive Committee Member, AVBD Lunglei kaihhruaiah Lunglei Medical Superintendent leh President, AVBD ni bawk Dr. SR. Ngurchamliana chuan Valentine's Day chu hmangaihna midangte tana inpekna ni  anih anga mamawh tu apiangte hman theih tura thisen pek runpui neih ani chu a inhmeh a tih thu a sawi a. Sum leh pai seng lova mite tanpui theihna hlu ber chu a thlawna thisen pek hi a ni tiin kan taksa a hrisel that phawt chuan thisen pek hi a hlauhawm lo a ni a ti bawk.

 Association for Blood Donation, Lunglei hi ni 19th October, 2001 a din a ni a, Lungleiah Blood Bank pahnih Civil Hospital leh Christian Hospital, Serkawn te neih mek  a ni. Voluntary a thisen pek chungchangah Lunglei District chhungah inzirtirna leh awareness campaign neih thin a ni a.  April  atanga December 2021 chhungin Lunglei Civil Hospital Blood Bank ah thisen unit 1603 pek niin unit 1594 (99.44%) chu Voluntary a pek a ni.

 Vawiin  Civil Hospital, Blood Bank a  thisen petute hi mimal, pawl leh thianzahote an ni, thisen petu te hi hmeichhia 27 leh mipa 44 niin, an vaiin mi 71 an ni.