No.3991/2021-2022

Aizawl, the 14th February 2022 : Vawiin khan Rural Development Minister Pu Lalruatkima hovin a Pisa ah District Rural Development Agency te (DRDA), District Rural Development Office (DRDO) ah te leh chungchang sawiho a ni a. Meeting ah hian Rural Development Link Secretary Pu Vanlalngaihsaka, DP &AR Secretary Pu K. Lalthawmmawia te bakah Finance Department aiawhte leh Rural Development Department officer dangte an tel a ni.

Minister Pu Lalruatkima chuan Sawrkar Laipuiin hun rei tak atanga an kalpui  tawh, DRDA Scheme chu ram pumah tihtawp an tum avangin DRDA in hna an thawhte chhunzawm zel anih thei nan District ah te RD Office chu a awm a ngai, DRDA hi tawp mahse hengte hi DRDO ah letin la kalpui zel chu tha nia Department in a hriat avangin he ruahmanna hi siam anih thu a sawi a. Panchayati Raj zawm state ah te chuan Zilla Parishad te hian DRDA hna hi la tura beisei an ni a, mahse Hmarchhak state tam zawkin Panchayati Raj kan zawm lova, Zilla Parishad ang te hi kan nei lova, chuvangin DRDA aiah DRDO hi kan mamawh takzet a ni tiin District a RD Scheme hrang hrang kaikhawmtu an awm loh chuan hmasawnna hna hrang hrang thawh a harsa thei nia a hriat thu te a sawi a ni.

DP&AR leh RD Department te chu hemi chungchanga an ngaihdan te zau taka sawi tura Minister in a sawm hnuin Department aiawh te chuan thil awm dan leh an ngaihdan te chu an sawihkhawm a. Meeting ah hian he ruahmanna atana thil pawimawh hrang hrang – post siamrem ngai zat te, Sawrkar sumbawm a nghawng dan tur te, District a RD Office pawimawhna leh an mawhphurhna te chu zau taka sawiho a ni. 

DRDO atana post tul zual tak tak 22 siam nan Rural Development Department hnuaia sanctioned post hrang hrang 22 pekkir surrender tum a ni a. Nikum khan DRDA a post hrang hrang 84 te chu Mizoram Sawrkar hnuaia dah ngheh absorbed an lo ni tawh a. District 8 ah hian DRDA inrelbawlna chu Project Director hnuaia awmin office hmun hma bakah quarters te pawh a nei vek a, District thar 3 ah erawh DRDA hmunhma tur hi buatsiah mek niin Addl DC te chuan PD hna hi an kawp mek a ni.  

Sawrkar Laipui chuan tunhnai khan Centrally Sponsored Scheme – District Rural Development Agency Administration Scheme chu April ni 1, 2022 atangin tihtawp a nih tur thu an rawn hriattir a, Zilla Parishad awmna state ah te chuan DRDA hi he body a chhunfin a rawt a, Zilla Parishad awm lohna state ah te chuan State Sawrkrin a duh angin ruahmanna siam mai se tiin an rawt a ni.